អាកាសចរណ៍ ម៉ាឡេស៊ី ប្រកាសផ្តល់សំណង បន្ថែមទៅសាច់ញាតិ ជនរងគ្រោះ ដោយសារ ធ្លាក់យន្តហោះ
សារព័ត៌មាន Cambodia News/
ម៉ាឡេស៊ី (២៦ មិនា ២០១៤) ៖ កាលពីថ្ងៃទី២៥ ខែមីនា ក្រុម ហ៊ុនអាកាសចរណ៍ របស់ប្រទេស ម៉ាឡេស៊ី ដែលជាម្ចាស់កម្មសិទ្ធិលើជើងហោះហើរ MH370 ដែលកំពុងបាត់ ខ្លួននោះបានប្រកាសថា ខ្លួននឹង ផ្តល់សំណងបន្ថែមទៀត ទៅកាន់សាច់ញាតិ នៃជនរងគ្រោះ ទាំងអស់ដែលជិះនៅលើយន្តហោះ ទោះបី រហូតមកដល់ពេលនេះ ប្រតិបត្តិការរុករកកំពុងបន្ត នៅឡើយក៏ដោយ។
គួរបញ្ជាក់ តាមការអះអាង របស់អាកាសចរណ៍ម៉ាឡេស៊ីថា មូលហេតុដែលនាំឲ្យនាយករដ្ឋ មន្ត្រីម៉ាឡេស៊ី ប្រកាសកាលពីយប់មិញថា គ្មាននរណាម្នាក់រស់រានមានជីវិតនោះ គឺយោង ទៅលើវិចារណញ្ញាណ របស់មនុស្ស ដែលជឿជាក់ដូច្នេះ។
វាជាការពិតណាស់ថា រយៈពេល ជាងកន្លះខែទៅហើយ ប្រាកដជាមិនអាចឲ្យជីវិតណា មួយរស់នៅបានឡើយ បើទោះបីជា បន្ទាប់ពីយន្តហោះធ្លាក់នោះ អាចអាចឲ្យអ្នកដំណើរមួយចំនួន នៅមាន ជីវិតក៏ដោយ។
ដោយឡែកនៅថ្ងៃអង្គារ នេះ អាកាសចរណ៍ម៉ាឡេស៊ី ក៏បានអះអាង ដូចទៅនឹងនាយករដ្ឋមន្ត្រី អូស្ត្រាលី ដែរថា ពួកគេ នឹងជូនដំណើរសាច់ញាតិជនរងគ្រោះ ទៅដល់ប្រទេសអូស្ត្រាលី ប្រសិនបើក្រុមរុករក រកឃើញបំណែក ណាមួយ ដែលមានជាប់ពាក់ព័ន្ធនឹងយន្តហោះនោះ៕