កម្មករខ្មែរស្លាប់ និងរបួសច្រើនក្នុងហេតុការណ៍បាក់អគារនៅថៃ
សារព័ត៌មាន Cambodia News/
ថៃ(២៧ កុម្ភៈ ២០១៤) ៖ តាមប្រភពព័ត៌មានពីប្រទេសថៃបានឱ្យដឹងថា អគារមន្ទីរពេទ្យមួយកន្លែងដែលកំពុងដំណើរការសាងសង់នៅក្នុងខេត្ត សាមុទ្រប្រាកាន ប្រទេសថៃ បានបាក់ស្រុតបណ្តាលឱ្យកម្មករខ្មែរ និងភូមាជាច្រើននាក់ស្លាប់ និងរងរបួស កាលពីវេលាម៉ោងជាង៣រសៀលថ្ងៃទី២៥ កុម្ភៈ កន្លងមកនេះ ។
ប្រភព ព័ត៌មានជំហានដំបូងដែលមិនទាន់ចាត់ទុកថា ត្រឹមត្រូវកម្រិតណានោះឱ្យដឹងថា មកទល់ពេលនេះមានកម្មករខ្មែរចំនួន៤នាក់ (ប្រុស៣នាក់ ស្រីម្នាក់) បានរកឃើញថាស្លាប់ នៅក្រោមគំនរបាក់បែកនៃអគារនេះ និងមួយចំនួនទៀតរងរបួសកំពុងសម្រាកព្យាបាលនៅក្នុងមន្ទីរពេទ្យ ក្នុងខេត្តសាមុទ្រប្រាកាន ប៉ុន្តែមិនទាន់ស្គាល់អត្តសញ្ញាណនៅឡើយទេ ។
កាសែត ថៃ បានរាយការណ៍កាលថ្ងៃអង្គារទី២៥ កុម្ភៈថា ចំនួនមនុស្សស្លាប់ពីការបាក់អគារកំពុងសាងសង់ នៅស្រុកបាងភី នៃខេត្តសមុទ្រប្រកាន ជិតក្រុងបាងកក កាលពីថ្ងៃអង្គារបានឡើងដល់ ១០ នាក់ និង ១៦ នាក់ រងរបួស។ កម្មករខ្មែរដែលស្លាប់ ក្នុងឧបទ្ទហេតុនេះ មិនទាន់ត្រូវបានបញ្ជាក់ពីអត្តយសញ្ញាណនៅឡើយទេ។
ពួកមន្ត្រី ជួយសង្គ្រោះ បាននិយាយថា ពិដានដែលធ្លាក់ជាប់នឹងអគារទី១ និងទី២ នៅជាន់ទី៤។ ពិដានប្រវែង ២០ គុណនឹង ១៥ ម៉ែត្រ និង កម្រាស់ ០,៣ ម៉ែត្រ បានធ្លាក់មកលើជាន់ទី២ ដោយសង្កត់លើកម្មករដែលកំពុងស្រស់ស្រូបអាហារ។ ប្រភពព័ត៌មាននេះមិនបានឱ្យដឹងថា ការបាក់ស្រុតអគារដែលកំពុងសាងសង់នេះបណ្តាលមកពីមូលហេតុអ្វី ឡើយ ។
សាកសពពីរនៅតែស្ថិតក្រោមគំនរបាក់បែក ក្នុងពេលអ្នកជួយសង្គ្រោះកំពុងទម្លុះរបាដែក។ សំណង់អគារនេះនៅផ្នែកខាងជើងមានស្នាមប្រេះ និងរន្ទារកោង។ ពួកវិស្វករ បាននិយាយថា ពួកអ្នកជួយសង្គ្រោះប្រឈមគ្រោះថ្នាក់ ពីព្រោះអគារទាំងមូលអាចនឹងរលំ៕
