អត្រាអ្នកស្លាប់ដោយគ្រោះថ្នាក់ចរាចរនៅកម្ពុជាខ្ពស់ជាងគេក្នុងតំបន់អាស៊ាន
សារព័ត៌មាន Cambodia News/
ភ្នំពេញ(២២ កុម្ភៈ ២០១៤)៖ ក្នុងសេចក្ដីប្រកាសព័ត៌មានកិច្ចប្រជុំគណៈរដ្ឋមន្ត្រីកាលពីថ្ងៃទី ២១ ខែកុម្ភៈឆ្នាំ២០១៤បានបង្ហាញថា ចំនួនអ្នកស្លាប់និងអ្នករបួស ដោយគ្រោះថ្នាក់ចរាចរផ្លូវគោកនៅប្រទេសកម្ពុជាមានអត្រាខ្ពស់ជាងគេនៅ ក្នុងតំបន់ អាស៊ាន។
ទោះបីជា អត្រាអ្នកស្លាប់ក្នុងយានយន្ត ១០.០០០ គ្រឿងបានថយចុះពី ១១ នាក់នៅឆ្នាំ ២០១០ មក ១០ នាក់នៅឆ្នាំ ២០១១ ក៏ពិតមែន ប៉ុន្តែចំនួនអ្នកស្លាប់សរុបជាក់ស្ដែង និងអត្រាស្លាប់ក្នុង ចំណោម ប្រជាជន ១០០.០០០ នាក់នៅតែបន្តកើនឡើងពី ១២,៧ នាក់ក្នុង ឆ្នាំ ២០១០ ដល់ ១៣,១ នាក់ ក្នុងឆ្នាំ ២០១១ ។
ករណី អត្រាស្លាប់ដោយគ្រោះថ្នាក់ចរាចរផ្លូវគោក នៅតែបន្តកើនឡើងនេះ រាជរដ្ឋាភិបាលកម្ពុជាបានលើកទឹកចិត្ត និងជំរុញឲ្យគ្រប់ផ្នែក គ្រប់វិស័យ ឲ្យយក ចិត្តទុកដាក់ខ្ពស់ចំពោះ បញ្ហាសុវត្ថិភាពចរាចរផ្លូវគោគ ដែលរាល់ការចំណាយលើសកម្មភាពទាំងអស់នេះ ត្រូវបាន ចាត់ទុកថា ជាការធ្វើវិនិយោគ មួយសម្រាប់ជួយបញ្ចៀសប្រជាជនឲ្យរួចផុត ពីគ្រោះមហន្តរាយ មួយរបស់សង្គមជាតិ ។
គោលនយោបាយជាតិ សុវត្ថិភាពចរាចរណ៍ផ្លូវគោក មានផែនការ សកម្មភាពចំនួន ៨ ស្របតាមសេចក្ដីសម្រេចរបស់អង្គការសហប្រជាជាតិ ដែលបានកំណត់ ក្នុងកិច្ចប្រជុំថ្នាក់រដ្ឋមន្ត្រីក្រសួងដឹកជញ្ជូនអន្តរជាតិ នាខែវិច្ឆិកា ឆ្នាំ ២០០៩ នៅទីក្រុងម៉ូស្គូ ប្រទេសរុស្ស៊ី ដែលមានគោលបំណងសំដៅកាត់បន្ថយចំនួនអ្នកស្លាប់នៅលើផ្លូវថ្នល់ឲ្យ បាន ថយចុះចំនួន ៥០% ពីឆ្នាំ ២០១១ ដល់ឆ្នាំ ២០២០៕
