ស្រោមអនាម័យ ១សែនស្រោម នឹងចែកក្នុងទិវា នៃក្តីស្រឡាញ់
សាព័ត៌មានយុវវ័យថ្មី/
ភ្នំពេញ(១៣ កុម្ភៈ ២០១៤) ៖ នៅទិវាស្រោម អនាម័យ អន្តរជាតិ និងទិវា នៃក្តីស្រឡាញ់ ថ្ងៃ ១៤ កុម្ភៈឆ្នាំ ២០១៤ ស្អែកនេះ ក្រសួងសុខាភិបាល និងអង្គការ មូលនិធិ ថែទាំសុខភាព អ្នកជំងឺអេដស៍ ហៅ កាត់ថា AHF សហការគ្នា នឹងចែកស្រោមអនាម័យ ១សែនស្រោម ដើម្បី លើក កម្ពស់ការយល់ដឹង ការពារបង្ការ HIV/AIDS។
ក្នុងទិវា នៃក្តីស្រឡាញ់ នៅថ្ងៃទី១៤កុម្ភៈ ដែលគេវាយតំលៃថា ជាទំនៀមទំលាប់ សម្រាប់ជនមួយ ចំនួនតូច ដែលនឹងប្រព្រឹត្តិ ការរួមភេទនោះ ស្រោមចំនួន១សែនស្រោម នឹងត្រូវចែកជូន ក្នុងយុទ្ធនាការ មួយដែល មានការសហការគ្នា រវាងក្រសួងសុខាភិបាល និងអង្គការ មូលនិធិថែទាំ សុខភាព អ្នកជំងឺអេដស៍ហៅកាត់ថា AHF នៅទីតាំង ក្នុងរាជធានីភ្នំពេញ។
ប្រធានការិយាល័ ប្រចាំតំបន់អាស៊ី នៃអង្គការ មូលនិធិថែទាំ សុខ ភាពអ្នកជំងឺអេដស៍( AHF) លោក ឈឹម សារ៉ាត់ មានប្រសាសន៍ ក្នុងកិច្ចប្រជុំពិគ្រោះយោបល់ ស្តីពីការរៀបចំទិវា ស្រោមអនាម័យអន្តរជាតិ២០១៤ ថ្ងៃទី១០ ខែ កុម្ភៈថា សភាពការណ៍ នេះត្រូវគេចាត់ទុកថា គ្រោះថ្នាក់ អាចនឹង មានមនុស្ស ឆ្លងជំងឺអេដស៍ ឬវីរុសហ៊ីវថ្មី ហើយសម្រាប់យុទ្ធនាការឆ្នាំនេះ នឹងមានការធ្វើតេស្តឈាម រកមេរោគអេដស៍ ផងដែរ។
ជាមួយគ្នានោះ លោក ឡុង ឡាវី អនុប្រធានមន្ទីរ សុខាភិបាលរាជធានីភ្នំពេញ មានប្រសាសន៍ថា សង្គ្រាមក្នុងការប្រយុទ្ធ នឹងមេរោគអេដស៍ មិនទាន់ចប់នៅឡើយទេ លុះត្រាតែ ពិភពលោកទទួលបាន ជោគជ័យរឺលុបបំបាត់ បានទាំងស្រុងមេរោគអេដស៍ ដែលបញ្ហានេះ ទាមទារឲ្យ មានកិច្ចសហការ គ្រប់ជ្រុងជ្រោយ៕
