រដ្ឋមន្ត្រីការបរទេសចិនសន្យាជួយស្រាវជ្រាវករណីជំងឺរាតត្បាតលើកុមារកម្ពុជា
កាលពីថ្ងៃអង្គារ ទី១០ កក្កដា ២០១២ លោក យ៉ាង ជាជី ( Yang JieChi ) ប្រមុខការទូតចិន ក្នុងពេលជួបប្រជុំជាមួយលោកនាយក រដ្ឋមន្ត្រី ហ៊ុន សែន នៅវិមានសន្តិភាព ក្នុងទីក្រុងភ្នំពេញ បានសន្យាបញ្ជូនគ្រូពេទ្យជំនាញ រួមជាមួយសម្ភារៈ ថ្នាំពេទ្យ មកកម្ពុជា ដើម្បីស្រាវជ្រាវ និងស្វែងរកដំណោះស្រាយលើជំងឺរាតត្បាត ដែលបានសម្លាប់កុមារកម្ពុជា ចំនួន ៥២ នាក់ ក្នុងរយៈពេលប៉ុន្មានសប្តាហ៍ចុងក្រោយនេះប្រកាសដូច្នេះ ។
សេចក្តីប្រកាសព័ត៌មានរួមរបស់ក្រសួងសុខាភិបាល និងអង្គការសុខភាពពិភពលោក ចេញផ្សាយនៅថ្ងៃទី៨ ខែកក្កដា ឆ្នាំ២០១២ បានលើកឡើងថា ជំងឺចម្លែក រាតត្បាត ដែលសម្លាប់កុមារកម្ពុជានោះ បានឆ្លងតាមរយៈការប៉ះពាល់ផ្ទាល់ ទៅនឹងសំបោរ កំហាក ទឹកមាត់ ទឹករងៃចេញពីពងបែក ឬលាមក របស់អ្នកជំងឺ។
ជំងឺនោះ ឆ្លងរាតត្បាតខ្លាំងបំផុត ក្នុងសប្តាហ៍ទី១។ ជំងឺរាតត្បាតចម្លែកលើកុមារនោះ ត្រូវគេស្គាល់ថា បង្កដោយ មេរោគ Enterovirus 71 ដែលជាជំងឺឆ្លងដ៏កាចសាហាវ ពីមនុស្សម្នាក់ទៅមនុស្សម្នាក់ទៀត។ បើគិតចាប់ពីខែមេសា ដល់ថ្ងៃទី៥ ខែកក្កដា ឆ្នាំ២០១២ ជំងឺរាតត្បាតដ៏ចម្លែកនោះ បានកើតមាន ៥៩ ករណី និងសម្លាប់កុមារកម្ពុជាចំនួន ៥២នាក់។ កុមារទាំងនោះ មានអាយុចាប់ពី ៣ខែ ដល់ ១១ឆ្នាំ។
បច្ចុប្បន្ន មិនមានការព្យាបាលជាក់លាក់ណាមួយ សម្រាប់ជំងឺពងបែកដៃជើង និងក្នុងមាត់ ដែលជាជំងឺឆ្លងរាតត្បាតលើកុមារនោះទេ។ ក្រសួងសុខាភិបាល និងអង្គការសុខភាពពិភពលោក បានអំពាវនាវឲ្យឪពុកម្ដាយ គួរស្វែងរកដំបូន្មានពីគ្រូពេទ្យ ប្រសិនបើកូនគាត់ ក្ដៅខ្លួន ក្អួត និងទន់ដៃទន់ជើង។ អ្នកជំងឺគួរផឹកទឹក ឬវត្ថុរាវឲ្យបានច្រើន។ ចំណែកបុគ្គលិកសុខាភិបាល គួរព្យាបាលអ្នកជំងឺ តាមរោគសញ្ញា និងមិនត្រូវប្រើថ្នាំ ស្ដេរ៉យ (Steroids) ឡើយ៕
