អ្នកបឹងកក់ ដាក់លិខិតថ្លែងអំណរគុណដល់សភាអាមេរិក
សារព័ត៌មាន Cambodia News /
ភ្នំពេញ(២៤ មករា ២០១៤)៖ នៅថ្ងៃទី២៤ ខែមករានេះ ប្រជាសហគមន៍បឹងកក់ប្រមាណ ជាង៧០នាក់ បានប្រមូលផ្តុំនៅមុខស្ថានទូតសហរដ្ឋអាមេរិកប្រចាំកម្ពុជា ដើម្បីដាក់លិខិតថ្លែងអំណរគុណដល់សភាអាមេរិក ដែលបានជួយជំរុញឲ្យមានដំណោះស្រាយករណីតំបន់បឹងកក់។
សកម្មជនដីធ្លីនៅតំបន់បឹងកក់ អ្នកស្រីទេព វន្នី ឲ្យដឹងថា ការដាក់លិខិតទៅសភាអាមេរិកតាមរយៈស្ថានទូតអាមេរិកប្រចាំកម្ពុជានៅ ថ្ងៃនេះ គឺក្នុងគោលបំណងថ្លែងអំណគុណដល់សភាសហរដ្ឋអាមេរិក ដែលបានអនុម័តច្បាប់ថវិកា ដោយមានលក្ខខណ្ឌរួមបញ្ចូល ក្នុងនោះ តម្រូវឲ្យធនាគារពិភពលោកជួយដោះស្រាយជូនអ្នកបឹងកក់ទាំងអ្នកដែលបាន ចាកចេញ និងអ្នកដែលមិនទាន់បានចាកចេញ។
ការប្រមូលផ្តុំរបស់អ្នកបឹងកក់ រហូតដល់ម៉ោងជិត៩ព្រឹកនេះ គេពុំឃើញមានកម្លាំងសមត្ថកិច្ចចុះទៅឃ្លាំមើល ឬបំបែកការប្រមូលផ្តុំនេះទេ ហើយនៅក្នុងដៃរបស់សកម្មជនបឹងកក់ចំនួន ៥២នាក់ បានទង់ជាតិសហរដ្ឋអាមេរិកម្នាក់មួយ ដែលតំណាងឲ្យរដ្ឋទាំង៥២របស់អាមេរិក និងអ្នកសល់ពីនោះកាន់ទង់សាសនា៕