លោក សម រង្ស៊ី ចូលបំភ្លឺបន្ទាប់ពីលោក កឹម សុខា បញ្ចប់ការឆ្លើយ
សារព័ត៌មាន Cambodia News /
ភ្នំពេញ(១៤ មករា ២០១៤) ៖ នៅម៉ោងជាង១០ព្រឹក ថ្ងៃទី១៤ ខែមករានេះ លោក សម រង្ស៊ី ប្រធានគណបក្សសង្គ្រោះជាតិ បានចាប់ផ្តើមចូលបំភ្លឺតាមការកោះហៅរបស់សាលាដំបូងរាជធានីភ្នំពេញ បន្ទាប់ ពីលោក រ៉ុង ឈុន និងលោក កឹម សុខា បានបញ្ចប់ការបកស្រាយរបស់ខ្លួននៅក្នុងសវនាការរបស់តុលាការ តែមិនទាន់អះអាងថា មានការចោទប្រកាន់អ្វីនៅឡើយទេ។
ការកោះហៅអ្នកទាំងបី ធ្វើឡើងបន្ទាប់ពីមានករណីប៉ះទង្គិចដោយហិង្សារវាងកងកម្លាំង សមត្ថកិច្ចរាប់រយនាក់ និងក្រុមកម្មករ ដែលតវ៉ាទាមប្រាក់ឈ្នួល១៦០ដុល្លារ កាលពីថ្ងៃទី០២ និងទី០៣ ខែមករា នៅមុខរោងចក្រយ៉ាកជីង ក្នុងខណ្ឌពោធិសែនជ័យ និងនៅមុខសួនឧស្សាហកម្មកាណាឌីយ៉ា ផ្លូវវ៉េងស្រេង បណ្តាលឲ្យកម្មករ ៥នាក់ស្លាប់ ជាច្រើននាក់រងរបួស និងមួយចំនួនទៀតត្រូវបានចាប់ខ្លួន។
កាលពីថ្ងៃទី០៤ ខែមករា អយ្យការអមសាលាដំបូងរាជធានីភ្នំពេញ បានកោះហៅប្រធានគណបក្សសង្គ្រោះជាតិ លោក សម រង្ស៊ី និងអនុប្រធាន លោក កឹម សុខា ឲ្យចូលបំភ្លឺ នៅថ្ងៃទី១៤ ខែមករា ករណីញុះញង់ឲ្យប្រព្រឹត្តបទឧក្រិដ្ឋ ឬអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម៕
