លោកអតីតប្រធានាធិបតីប៉ាគីស្ថាន Asif Ali Zardari បង្ហាញមុខនៅតុលាការប្រឆំាងអំពើពុករលួយ
នៅ ក្នុងប្រទេសប៉ាគីស្ថាន លោកអតីតប្រធានាធិបតី Asif Ali Zardari បានបង្ហាញខ្លួននៅមុខតុលាការជាលើកទី១ នាថ្ងៃព្រហស្បតិ៍ ទី៩ មករានេះ។ លោក Asif Ali Zardari បានជាប់សង្ស័យពីបទបានលួចបង្វែរលុយដោយខុសច្បាប់រាប់សិប លានដុល្លារក្នុងទសវត្សឆ្នំា ៩០ នេះបើយោងតាមការបញ្ជាក់របស់ថ្នាក់ដឹកនំាប៉ាគីស្ថាន។
លោក អតីតប្រធានាធិបតីប៉ាគីស្ថាន Asif Ali Zardari បានជាប់សង្ស័យពីបទប្រព្រឹត្តិអំពើពុករលួយមួយចំនួនក្នុងទសវត្ស ឆ្នំា ៩០ មានដូចជា ការលាងសម្អាតលុយកខ្វក់ ការទទួលសំណូកនៅក្នុងកុងត្រាដែលរដ្ឋាភិបាលបានផ្តល់ឲ្យក្រុមហ៊ុន ប្រទេសស្វីស និងការសាងសង់ដោយខុសច្បាប់លើទីលាន Polo មួយស្ថិតក្រោយនិវេសនដ្ឋាននាយករដ្ឋមន្រ្តី។ នាយករដ្ឋមន្រ្តីក្នុងជំនាន់នោះ គឺលោកស្រី Benazia Bhutto ដែលត្រូវជាភរិយារបស់លោក Asif Ali Zardari និងដែលលោកស្រីត្រូវបានគេបាញ់សម្លាប់កាលពីឆ្នំា ២០០៧។
ក្នុងនាមជាប្រធានាធិបតីពីខែកញ្ញា ឆ្នំា២០០៨ ដល់ខែកញ្ញា ឆ្នំា ២០១៣ លោក Zardari មានអភ័យឯកសិទ្ធិពិសេសដែលតុលាការមិនអាចប៉ះបានទេ តែតុលាការបានចាប់ផ្តើមបើកសំណុំរឿងនេះជាថ្មី នៅក្រោយការបញ្ចប់អាណត្តិរបស់លោកក្នុងខែកញ្ញា ឆ្នំា ២០១៣។ តែក្រុមមេធាវីការពារលោក Zardari បានអះអាងថា ទម្ងន់ទោសដែលលោក Zardari ត្រូវទទួលក៏មិនធ្ងន់ធ្ងរដែរ ព្រោះថា អ្នកជាប់ចោទផ្សេងទៀតនៅក្នុងសំណុំរឿងនេះ មានអ្នកខ្លះបានរួចខ្លួន និងអ្នកខ្លះទៀតបានស្លាប់អស់ទៅហើយ។
នៅក្នុងសវនាការថ្ងៃនេះ លោក Zardari ត្រូវទទួលការចោទប្រកាន់ជាផ្លូវការក្នុងរឿងសំណង់លើទីលាន Polo ដោយខុសច្បាប់ តែគ្មានភស្តុតាងដើម្បីដាក់បន្ទុកលើលោកទេ ព្រោះគ្មានសាក្សីណាម្នាក់បានប្រឆំាងនឹងលោកនៅក្នុងសំណុំរឿងនេះ ទេ។ អ្វីជាការកត់សម្គាល់នោះគឺថា ចំពេលដែលលោក Zardari បានមានវត្តមាននៅមុខតុលាការប្រឆំាងអំពើពុករលួយដូចការគ្រោងទុកនោះ លោកអតីតប្រធានាធិបតីប៉ាគីស្ថានម្នាក់ទៀត គឺលោកអតីតឧត្តមសេនីយ៍ Pervez Musharraf មិនបានបង្ហាញខ្លួននៅមុខតុលាការពិសេសពីបទបានព្យួរ ច្បាប់រដ្ឋធម្មនុញ្ញ និងដាក់ប្រទេសក្នុងភាពអាសន្នកាលពីឆ្នំា ២០០៧។
អ្នកនំាពាក្យរបស់លោក Zardari បានអះអាងថា គេមិនអាចប្រៀបប្រដូចដំណើរការកាត់ទោសរវាងអតីតប្រធានាធិបតី ប៉ាគីស្ថានទំាងពីររូបនេះបានទេ ព្រោះថា លោក Asif Ali Zardari ជាប្រធានាធិបតីស៊ីវិលជាប់ឆ្នោតតាមបែបលទ្ធិប្រជាធិបតេយ្យ រីឯលោក Pervez Musharraf ជាប្រធានាធិបតីផ្តាច់ការចូលកាន់អំណាចដោយធ្វើរដ្ឋប្រហារយោធា៕ដោយ គួច គន្ធារ៉ា (RFI)