មនុស្សជាង ៣៥០ នាក់នៅជប៉ុនធ្លាក់ខ្លួនឈឺដោយសារអាហារមានជាតិថ្នាំសម្លាប់សត្វល្អិត
ប្រព័ន្ធផ្សព្វផ្សាយក្នុងស្រុក របស់ជប៉ុន ឲ្យដឹងកាលពីថ្ងៃអង្គារថា មនុស្សជាង ៣៥០ នាក់ទូទាំងប្រទេសជប៉ុនបានធ្លាក់ខ្លួនឈឺ ក្រោយពេលទទួលទានអាហារក្លាសេឲ្យកកដែលមានជាតិថ្នាំសម្លាប់ សត្វល្អិត។ អាហារនេះផលិតដោយក្រុមហ៊ុនអាហារសមុទ្រដ៏ធំបំផុតមួយរបស់ជប៉ុន។
អ្នក ធ្លាក់ខ្លួនឈឺទាំងនោះ មានអាការៈក្អូតចង្អោរ រាគរូស និងអាការៈពុលអាហារផ្សេងៗទៀត ក្រោយពីបានបរិភោគអាហារដូចជា ភីស្សា ឡាសាញ៉ា ដែលផលិតដោយសាខាមួយរបស់ក្រុមហ៊ុន Maruha Nichiro Holdings។
ការ ស៊ឺបអង្កេតរបស់ប៉ូលិសឲ្យដឹងថា អាហារសមុទ្រកកខ្លះ មានផ្ទុកសារធាតុ malathion ជាសារធាតុគីមីមួយក្នុងថ្នាំសម្លាប់សត្វល្អិតក្នុងដំណាំពោតនិង ស្រូវ។
ក្រុមហ៊ុន Maruha Nichiro និយាយថា ក្រុមហ៊ុនបានទទួលទូរស័ព្ទប្រហែល បួនសែន ប្រាំមួយម៉ឺនពីអតិថិជនទាក់ទងនឹងការពុលអាហារនេះ ហើយថាអតិថិជនខ្លះផ្តល់ដំណឹងថា អាហារបង្កករបស់ក្រុមហ៊ុនមានក្លិនមិនល្អ។
ប្រភពពត៌មានក្នុង ស្រុកនានាឲ្យដឹងថា ប៉ូលិសសង្ស័យថាអាហារសមុទ្រទាំងនោះ គឺមានប៉ះពាល់ថ្នាំសម្លាប់សត្វល្អិត ពេលកែឆ្នៃក្នុងរោងច័ក្រ ដែលឋិតនៅប៉ែកខាងជើងក្រុងតូក្យូ។
ក្រុមហ៊ុនបានប្រមូលផលិតផល ដែលអាចមានជាតិថ្នាំសម្លាប់សត្វល្អិត ប្រាំមួយលានបួនសែនកញ្ចប់មកវិញ ដែលមកទល់ពេលនេះទើបតែប្រមូលបានតែ មួយលាន ពីរសែនកញ្ចប់ទេ។
ក្រុមហ៊ុនផលិតអាហារសមុទ្រកកនេះបន្ថែមថា អាហាររបស់ខ្លួនមិននាំចេញទៅបរទេសទេ៕(Radio Australia)