អ្នកបឹងកក់នៅតែតវ៉ាឲ្យអាជ្ញាធរចែកដីដែលរដ្ឋាភិបាលប្រគល់ឲ្យ
អ្នកបឹងកក់ និងតំណាងរបស់ពួកគេ ១៣នាក់ ដែលទើបតែរួចខ្លួនពីការឃុំឃាំងនៅពន្ធនាគារព្រៃស ដោយសារជម្លោះដីធ្លី បានប្រកាសថា ពួកគេនឹងនៅតែបន្តការតវ៉ា ដើម្បីឲ្យអាជ្ញាធរមានសមត្ថកិច្ចបែងចែកដី ដែលរដ្ឋាភិបាលប្រគល់ឲ្យ។
លោក អ៊ី សារុំ អ្នកសម្របសម្រួលកម្មវិធី នៃសមាគមធាងត្នោត បាននិយាយថា មកដល់ពេលនេះ គឺនៅមានពលរដ្ឋប្រមាណ ៧០គ្រួសារ កំពុងស្ថិតនៅជាគ្រួសារដែលត្រូវកាត់ចេញពីដីទំហំ ១២,៤៤ហិកតារ។
យោងតាមរបាយការណ៍នៃការសិក្សារបស់សមាគមធាងត្នោតបានបង្ហាញថា អ្នកបឹងកក់ចំនួនជាង ៣.៥០០គ្រួសារ ត្រូវបង្ខំចិត្តទទួលយកសំណង និងបានចាកចេញពីតំបន់បឹងកក់ ទៅតាំងទីលំនៅឋានថ្មីនៅក្រៅក្រុង សម្រាប់ពលរដ្ឋដែលនៅសល់ពីការចាកចេញនោះ គួរជាអ្នកដែលទទួលបានចំណែកដីដែលរដ្ឋាភិបាលប្រគល់ឲ្យតែជាលទ្ធផល គឺមានអ្នកដែលត្រូវកាត់ចេញ។
អ្នកស្រី ហេង មុំ ដែលជាតំណាងអ្នកភូមិបឹងកក់ បានឲ្យដឹងថា ផ្ទះរបស់អ្នកស្រីមានភាគខ្លះនៅក្នុងបឹង និងភាគខ្លះនៅជាប់មាត់បឹង ប៉ុន្តែគ្រួសារអ្នកស្រីពុំបានទទួលចំណែកដី ដែលរដ្ឋាភិបាលប្រគល់ឲ្យឡើយ គឺត្រូវស្ថិតក្នុងចំណោមគ្រួសារដែលត្រូវឆ្វៀលចេញ។ ប៉ុន្តែអ្នកស្រីនៅតែបន្តធ្វើការទាមទារ ព្រោះអ្នកស្រីក៏ជាអ្នកដែលមានសិទ្ធិទទួលបានដី ដែលរដ្ឋាភិបាលបានប្រទានកម្ម ឬប្រគល់ឲ្យអ្នកបឹងកក់។
តំណាង អ្នកបឹងកក់ អ្នកស្រី ទេព វន្នី មានប្រសាសន៍ថា អ្នកដែលទទួលបានកម្មសិទ្ធិដី គឺគេបានតែដីដែលពួកគេកំពុងរស់នៅប៉ុណ្ណោះ ហេតុនេះ ក្បាលដីដែលនៅសល់ គួរតែត្រូវផ្ដល់ទៅអោយអ្នកដែលត្រូវឆ្វៀលចេញ។
កាលពីខែសីហា ឆ្នាំ២០១១ រដ្ឋាភិបាលកម្ពុជាបានសម្រេចកាត់ដីតំបន់បឹងកក់ទំហំ ១២,៤៤ហិកតារ ទៅអ្នកបឹងកក់ចំនួនជិត ៨០០គ្រួសារ ដែលជ្រើសរើសយកការអភិវឌ្ឍនៅនឹងកន្លែង។ នៅក្រោយការប្រគល់ដីនោះ ក៏ស្រាប់តែមានអ្នកភូមិចំនួនជាង ៩០គ្រួសារ ត្រូវបានអាជ្ញាធរឆ្វៀលចេញ ដោយមិនផ្ដល់កម្មសិទ្ធិដីអោយឡើយ ហើយរហូតមកដល់ពេលនេះ គឺនៅសល់ប្រមាណ ៧០គ្រួសារ។ មកដល់ពេលនេះ មានអ្នកភូមិបឹងកក់ជាង ៦០០គ្រួសារហើយ ដែលទទួលបានកម្មសិទ្ធិដីធ្លីក្នុងដីដែលរដ្ឋាភិបាលបានផ្ដល់ឲ្យ៕
