ចិនកម្ទេចភ្លុកដំរីចំនួន៦តោនដើម្បីបង្ហាញពីកិច្ចខិតខំប្រឹងប្រែងទប់ស្កាត់ការជួញដូរភ្លុកដំរីខុសច្បាប់
នៅថ្ងៃ ចន្ទនេះ អាជ្ញាធរចិនបានកម្ទេចចោលនូវភ្លុកដំរីប្រមាណជាង ៦តោន។ ការកម្ទេចភ្លុកដំរីនេះត្រូវបានធ្វើឡើងជាសាធារណៈ ហើយវាជាហេតុការណ៍ដ៏កម្រមួយនៅប្រទេសចិន ដែលជាទូទៅ តែងតែទទួលរងនូវការរិះគន់ថាជាទិសដៅដ៏ធំនៃការជួញដូរភ្លុកដំរី ខុសច្បាប់ ពីតំបន់អាហ្វ្រិក។
ការកម្ទេចភ្លុកដំរី ត្រូវបានធ្វើឡើង នៅខេត្តប៉ែកខាងត្បូងប្រទេសចិន ហើយដោយមានការផ្សាយបន្តផ្ទាល់ នៅលើកញ្ចក់ទូរទស្សន៍ជាតិ។ កាសែតផ្លូវការចិនបានហៅការកម្ទេចភ្លុកដំរីនេះថាជាព្រឹត្តិការណ៍ដ៏ ធំមិនធ្លាប់មាន នៅក្នុងប្រទេសចិន។
អាជ្ញាធរចិនបានឲ្យដឹងថា ភ្លុកដំរី ដែលត្រូវកម្ទេចចោលនៅពេលនេះ មានបរិមាណជាង ៦តោន ហើយបានមកពីការរឹបអូសពីឈ្មួញខុសច្បាប់ នៅក្នុងរយៈពេលជាច្រើនឆ្នាំកន្លងទៅនេះ ហើយថា ការកម្ទេចភ្លុកដំរីជាសាធារណៈនេះ ធ្វើឡើង ដើម្បីបង្ហាញពីកិច្ចខិតខំប្រឹងប្រែងរបស់អាជ្ញាធរចិនក្នុងការ ទប់ស្កាត់ការជួញដូរភ្លុកដំរីដោយខុសច្បាប់។
គួរបញ្ជាក់ថា កន្លងមក អង្គការ និងសកម្មជនការពារសត្វព្រៃតែងតែបានលើកឡើងថា ការកើនឡើងនៃតម្រូវការភ្លុកដំរី នៅអាស៊ី និងអសមត្ថភាពរបស់អាជ្ញាធរក្នុងការបំបែកបណ្តាញជួញដូរភ្លុកដំរីដោយ ខុសច្បាប់ គឺជាដើមហេតុដ៏សំខាន់មួយ ដែលនាំឲ្យមានការកើនឡើងនៃការបរបាញ់ដំរីដោយខុសច្បាប់ នៅក្នុងតំបន់អាហ្វ្រិក។
អ្នកជំនាញយល់ថា ភ្លុកដំរីក្នុងទីផ្សារងងឹតភាគច្រើន ត្រូវបានគេយកទៅលក់ នៅក្នុងប្រទេសចិន ដោយសារតែប្រជាជនចិនទូទៅជឿថា ភ្លុកដំរី គឺជាឱសថដ៏ស័ក្តិសិទ្ធិក្នុងការព្យាបាលជំងឺនានា។
កាលពីខែមីនា ឆ្នាំ២០១៣កន្លងទៅនេះ អង្គការអនុសញ្ញាស្តីពីការជួញដូរជាអន្តរជាតិនៃប្រភេទសត្វកំពុង ទទួលរងការស្លាប់ផុតពូជ (Convention on International Trade in Endangered Species) បានចាត់បញ្ចូលប្រទេសចិន ទៅក្នុងចំណោមប្រទេសទាំង ៨ ដែលមិនបានចាត់វិធានការគ្រប់គ្រាន់ ក្នុងការទប់ស្កាត់ការជួញដូរភ្លុកដំរីដោយខុសច្បាប់។
អង្គការសង្រ្គោះដំរី (ហៅតាមភាសាអង់គ្លេសថា “Save The Elephants”) ដែលមានទីស្នាក់ការ នៅក្នុងប្រទេសអង់គ្លេស បានថ្លែងអបអរសាទរចំពោះចំណាត់ការរបស់អាជ្ញាធរចិន ដែលបានបំផ្លាញភ្លុកដំរីជាសាធារណៈ កាលពីថ្ងៃចន្ទ ដោយលើកឡើងថា ជាមួយនឹងវិធានការបែបនេះ ពិភពលោកអាចនឹងជួយសង្រ្គោះដំរី ឲ្យរួចផុតពីការស្លាប់ផុតពូជបាន៕ដោយ សេង ឌីណា (RFI)