បន្ទាប់ពីការចរចាប្រាក់ឈ្នួលគោលបរាជ័យ សហជីពធំៗ ប្រកាសធ្វើបាតុកម្មទ្រង់ទ្រាយធំ
ភ្នំពេញ៖ បន្ទាប់ពីក្រសួងការងារ និងសហជីព បរាជ័យក្នុងការចរចាដំឡើងប្រាក់ឈ្នួលបន្ថែមដល់កម្មករ នៅថ្ងៃទី៣០ ខែធ្នូរ នេះ សហជីពធំៗចំនួនពីរ ប្រកាសជំហរថា ខ្លួននៅតែបន្តធ្វើបាតុកម្មទ្រង់ទ្រាយធំ ដើម្បីតវ៉ាទាមទារប្រាក់ខែគោលកម្មករ១៦០ដុល្លារ បន្ទាប់ពីក្រសួងការងារ ប្រកាសឲ្យកម្មករ និងសហជីពទទួលយកប្រាក់ឈ្នួល៩៥ដុល្លារ។
ប្រធានសហជីពសេរីកម្មករនៃ ព្រះរាជាណាចក្រកម្ពុជាលោក ជា មុន្នី មានប្រសាសន៍ថា លោកនៅតែបន្តដឹកនាំកម្មករធ្វើបាតុកម្មទ្រង់ទ្រាយ ដើម្បីទាមទារប្រាក់ឈ្នួលកម្មករ១៦០ដុល្លារឲ្យបាន។
លោក បន្តថា កម្មករនឹងទទួលបានប្រាក់ឈ្នួល ដែលពួកគេកំពុងទាមទាររាល់ថ្ងៃនេះ ព្រោះការដែលសមាគមរោងចក្រកាត់ដេរ ប្រកាសនៅថ្ងៃនេះ គ្រាន់តែចង់បង្ហាញប្រាប់ក្រសួងការងារ ក៏ដូចជារដ្ឋាភិបាល ត្រូវតែកាត់បន្ថយនូវអំពើពុករលួយដែលខ្លួនបានប្រព្រឹត្តកន្លងមក ។
កម្មកររាប់ពាន់នាក់ មានលើកបដាសរសេរថា ១៦០ដុល្លារ ហើយស្រែកទាមទារដំឡើងប្រាក់ឈ្នួលនោះ បានចាប់ផ្តើមបិទផ្លូវនៅមុខក្រសួងការងារ នៅព្រឹកថ្ងៃចន្ទនេះ ដើម្បីជំរុញឲ្យភាគីពាក់ព័ន្ធរួមមានតំណាងក្រុមហ៊ុន និងរដ្ឋាភិបាល សម្រេចដំឡើងប្រាក់ខែ ដើម្បីឲ្យពួកគាត់អាចរស់នៅបានក្នុងជីវភាពសមរម្យ៕ Cambodia News