ភ្នំពេញកំពុងប្រឈមនឹងបញ្ហាសំរាមយ៉ាងខ្លាំង
ភ្នំពេញ៖ បច្ចុប្បន្ន ប្រជាពលរដ្ឋរស់នៅក្នុងរាជធានី មានការរអ៊ូរទាំអំពីភាពយឺតយ៉ាវនៃការប្រមូលសំរាម និងការបង្ហាញអារម្មណ៍អំពីភាពខ្វះអនាម័យនៅតាមដងផ្លូវ ដែលសម្បូរណ៍ទៅដោយសំរាម។ សំរាមដែលពេលខ្លះ បានរាយប៉ាយនៅតាមដងផ្លូវ ដោយសារតែពលរដ្ឋមួយចំនួនមិនបានចូលរួមសំអាត ហើយខ្វះខាតការយល់ដឹងផ្នែកបរិស្ថាន
បរិមាណសំរាមកាន់តែកើនឡើង ប៉ុន្តែដំណោះស្រាយអំពីបញ្ហាសំរាមនៅតែមិនទាន់មាននៅ ឡើយ។ បញ្ហាសំរាមមិនមែនជាបញ្ហាដាច់ដោយឡែករបស់អាជ្ញាធរ ឡើយ វាទាមទារអោយមានការចូលរួមទាំងអស់គ្នា ដោយសារតែសំរាម វាកើតចេញពីការរស់នៅរបស់ពលរដ្ឋ ដូច្នេះការទុកដាក់សំរាមអោយមានរបៀបរៀបរយ ដើម្បីអនាម័យនោះ វាគឺជារឿងចាំបាច់បំផុត ដែលត្រូវផ្តើមចេញពីពលរដ្ឋ។
និយាយអំពីសំរាម ដែលគេត្រូវញែកអោយដាច់ពីគ្នា រវាងសំរាមសើម និងសំរាមស្ងួតនោះ អាជ្ញាធររាជធានីធ្លាប់បានផ្សព្វផ្សាយជាហូរហែរអប់រំពលរដ្ឋអំពី ការញែកសំរាមនេះ។ មិនតែប៉ុណ្ណោះ ធុងសំរាមជាច្រើនដែលសំដៅប្រាប់ពលរដ្ឋអោយបោះចោលសំរាមដាច់ដោយឡែក ពីគ្នានោះ ក៏ត្រូវបានដាក់នៅតាមទីសាធារណៈជាច្រើនដែរ ប៉ុន្តែការញែកសំរាមនៅតាមគេហដ្ឋានរបស់ពលរដ្ឋ មិនទាន់ត្រូវបានអនុវត្តនៅឡើយទេ។
និយាយសរុបមកវិញ ការសំអាតទីក្រុង តាមរយៈការបំបាត់សំរាម វាគឺជាដំណើរការដ៏វែងមួយដែលត្រូវស៊ីសង្វាក់គ្នា ហើយត្រូវតែមានការចូលរួមពីគ្រប់មជ្ឈដ្ឋាន។ ប៉ុន្តែ សាលារាជធានីដែលជាអាជ្ញាធរ ក៏គួរតែជាអ្នកនាំមុខក្នុងការងារនេះ ពោលគឺ បន្តការអប់រំដល់ពលរដ្ឋ និងពង្រឹងសមត្ថភាពនៃការប្រមូលសំរាមរបស់ក្រុមហ៊ុន៕ នាង/Cambodia News
