អាមេរិកសន្យាជួយពង្រឹងទ័ពល្បាត វៀតណាម និងហ្វីលីពីន នៅសមុទ្រចិនភាគខាងត្បូង
បន្ទាប់ពី ប្រទេសវៀតណាម ប្រមុខការបរទេសអាមេរិក លោកJonh Kerry កំពុងចេញទៅបំពេញទស្សនកិច្ចនៅប្រទេសហ្វីលីពីន នៅថ្ងៃអង្គារទី ១៧ ធ្នូ។ ទាំងនៅវៀតណាម និងនៅហ្វីលីពីន រដ្ឋមន្រ្តីការបរទេសអាមេរិកបានសន្យាផ្តល់ជំនួយយោធា ដើម្បីធ្វើយ៉ាងណាឲ្យប្រទេសនៅអាស៊ានអាចយាមល្បាត ការពារដោយប្រសិទ្ធិភាពតំបន់ដែនទឹករបស់ខ្លួន នៅសមុទ្រចិនខាងត្បូង។ សមុទ្រចិនខាងត្បូង ដែលទាំងហ្វីលីពីន និងវៀតណាម កំពុងឈ្លោះដណ្តើមដីកោះជាមួយមហាអំណាចចិន។
មុន ទៅដល់ហ្វីលីពីន ប្រមុខការបរទេសអាមេរិកបានសន្យាទៅកាន់មេដឹកនាំវៀតណាមថា អាមេរិកនឹងជួយប៉ូលិស អាជ្ញាធរវៀតណាម ដើម្បីគ្រប់គ្រងដែនទឹក ដែលកំពុងជាប់មានជម្លោះជាមួយប្រទេសចិន។ តាមសមភាគីវៀតណាម ជំនួយរបស់អាមេរិកនឹងធ្វើឡើងនៅក្នុងទ្រង់ទ្រាយបង្វឹកសមត្ថភាព ឆ្មាំសមុទ្រ និងធ្វើទំនើបកម្មកប៉ាល់ល្បាតរបស់កងទ័ពជើងទឹកវៀតណាម នៅសមុទ្រចិនភាគខាងត្បូង។
កាលពីថ្ងៃចន្ទ នៅក្នុងប្រទេសវៀតណាម រដ្ឋមន្រ្តីការបរទេសអាមេរិកបានប្រកាសផ្តល់ជំនួយ ប្រមាណ ៣២លានកន្លះ ដើម្បីជួយពង្រឹងសមត្ថភាពយាមល្បាតសមុទ្ររបស់ប្រទេសសមាជិកអាស៊ាន ដែលនៅក្នុងនោះ មានជាពិសេស វៀតណាម និងហ្វីលីពីន។
គឺនៅហ្វីលីពីន ដែលលោកJohn Kerry ត្រូវជំរុញឲ្យចេញជារូបរាងកិច្ចព្រមព្រៀងយោធារវាងអាមេរិក និងហ្វីលីពីន។ កិច្ចព្រមព្រៀងដែលនឹងអនុញ្ញាតឲ្យអាមេរិកបង្កើនវត្តមានទ័ព និងចូលចតនាវាចម្បាំងរបស់ខ្លួន ដោយបណ្តោះអាសន្ន នៅហ្វីលីពីន។ រហូតមកដល់ពេលនេះ ហ្វីលីពីន និងអាមេរិកនៅមិនទាន់ចុះកិច្ចព្រមព្រៀង ដោយសារហ្វីលីពីនបារម្ភខ្លាច អាមេរិកវិលត្រលប់មកបោះទីតាំងជាអចិន្ត្រៃយ៍ ដូចកាលពីមុនឆ្នាំ ១៩៩២ទៀត។
ប៉ុន្តែ តាមអ្នកជំនាញនយោបាយអាស៊ី ជំនួយសន្ធឹកសន្ធាប់របស់អាមេរិក សម្រាប់ជួយហ្វីលីពីន ក្រោយព្យុះហៃយ៉ាន់ និងការគំរាមកំហែងរបស់ចិន នៅក្នុងជម្លោះដណ្តើមប្រជុំកោះ នៅសមុទ្រចិនខាងត្បូង អាចជាចលករជំរុញឲ្យហ្វីលីពីនទន់ចិត្ត និងចុះកិច្ចព្រមព្រៀងយោធាបន្ថែមជាមួយអាមេរិក។
សន្តិភាព និងស្ថិរភាពនៅសមុទ្រចិនខាងត្បូង ជាអាទិភាពចំបងរបស់អាមេរិក។ នេះជាការបញ្ជាក់របស់លោកJohn Kerry។ លោកJohn Kerry ដែលត្រូវគេវាយតម្លៃថា កំពុងឆ្លៀតឱកាសយកទស្សនកិច្ចលើកនេះ ដើម្បីបញ្ជាក់ភាពស្របច្បាប់ និងជំនួយដោយខានមិនបាន របស់អាមេរិក នៅក្នុងជម្លោះសមុទ្រចិនភាគខាងត្បូង។ កាសែតចិន វិញ ដែលជាឧបករណ៍ឃោសនារបស់ទីក្រុងប៉េកាំង ទើបតែបានចុះផ្សាយ កាលពីចន្ទម្សិលមិញ ថា វត្តមាននាវាចម្បាំងរបស់អាមេរិកនៅសមុទ្រចិនភាគខាងត្បូង កំពុងគំរាមកំហែងសន្តិសុខរបស់ចិន៕ដោយ ឈាង បុប្ផា (RFI)