ប្រធានាធិបតីអ៊ុយក្រែន វិចទ័រ យ៉ានូកូវិច ចេញទៅប្រទេសចិន
នៅថ្ងៃអង្គារនេះ ប្រធានាធិបតីអ៊ុយក្រែន លោក វិចទ័រ យ៉ានូកូវិច បានចាកចេញពីទីក្រុង Kiev ធ្វើដំណើរឆ្ពោះទៅប្រទេសចិន។ ប្រធានាធិបតីអ៊ុយក្រែន ចាកចេញពីប្រទេស ចំពេលអ៊ុយក្រែនកំពុងជួបវិបត្តិ បន្ទាប់ពីអ៊ុយក្រែនបានផ្អាកការចុះហត្ថលេខាលើកិច្ចព្រមព្រៀង បង្កើតដៃគូយុទ្ធសាស្ត្រជាមួយសហភាពអឺរ៉ុប។
នៅថ្ងៃ អង្គារនេះ ប្រធានាធិបតីអ៊ុយក្រែន លោក វិចទ័រ យ៉ានូកូវិច បានចាកចេញពីទីក្រុង Kiev ដើម្បីទៅបំពេញទស្សនកិច្ចនៅប្រទេសចិន រយៈពេល៤ថ្ងៃ។ ទស្សនកិច្ចរបស់ប្រធានាធិបតីអ៊ុយក្រៃននៅចិន ធ្វើឡើង ចំពេលអ៊ុយក្រែនកំពុងរងវិបត្តិ។ វិបត្តិដែលកើតឡើង ក្រោយពេលអ៊ុយក្រែន ស្ថិតក្រោមសម្ពាធរុស្ស៊ី បានផ្អាកការចុះហត្ថលេខាលើកិច្ចព្រមព្រៀងបង្កើតដៃគូយុទ្ធសាស្ត្រ ជាមួយសហភាពអឺរ៉ុប នៅថ្ងៃ២១វិច្ឆិកាកន្លងទៅ។
នៅក្នុងប្រទេស ឯណេះវិញ សភាអ៊ុយក្រែនបានបោះឆ្នោតទាត់ចោលញត្តិរបស់ក្រុមប្រឆាំងដែល ចង់ដកសេចក្តីទុកចិត្តពីរដ្ឋាភិបាល ជាមួយនឹងសម្លេងគាំទ្ររដ្ឋាភិបាល២២៦សម្លេង ក្នុងចំណោមសម្លេងសរុប៤៤១។ នៅរដ្ឋាភិបាលអ៊ុយក្រែន គណបក្សរបស់ប្រធានាធិបតី វិចទ័រ យ៉ានូកូវិច មានសមាសភាពភាគច្រើន។ សម្លេងចង់ដកសេចក្តីទុកចិត្តពីរដ្ឋាភិបាល មានត្រឹមតែ១៨៦ប៉ុណ្ណោះ។
ដោយឡែក នាយករដ្ឋមន្ត្រីអ៊ុយក្រែន បានចេញមុខធ្វើការសុំទោសជាភាសារុស្ស៊ី ចំពោះការបង្ក្រាបបាតុកម្មដែលធ្វើឡើងពីសំណាក់ប៉ូលិស កាលពីយប់ថ្ងៃសុក្រ ឈានចូលព្រឹកថ្ងៃសៅរ៍កន្លងទៅ។ គួររំលឹក ថា ឆ្លៀតពេលដែលប្រជាជនអ៊ុយក្រែនធ្វើបាតុកម្មប្រឆាំងនឹងការ ផ្អាកចុះហត្ថលេខាលើកិច្ចព្រមព្រៀងបង្កើតដៃគូយុទ្ធសាស្ត្ររវាង អ៊ុយក្រែននិងសហភាពអឺរ៉ុប ក្រុមបាតុករប្រឆាំងអ៊ុយក្រែនបានឆ្លៀតធ្វើចលនាប្រឆាំងទាមទារ អោយប្រធានាធិបតី យ៉ានូកូវិច ចុះពីអំណាច។ ភាពតានតឹងក្នុងប្រទេសដោយសារសកម្មភាពប្រឆាំងនេះ ចាប់រាលដាលធំឡើង គិតចាប់ពីពេលអ៊ុយក្រែនរងនូវចលនាបដិវត្តន៍ទឹកក្រូច កាលពីចុងឆ្នាំ២០០៤មក។
ទស្សនកិច្ចប្រធានាធិបតីអ៊ុយក្រែននៅចិន សបង្ហាញថា អ៊ុយក្រែននៅមានប្រទេសជាដៃគូផ្សេងទៀត ក្រៅពីសហភាពអឺរ៉ុប និងរុស្ស៊ី។
ប៉ុន្តែ ក្នុងពេលអ៊ុយក្រែនកំពុងជួបវិបត្តិបែបនេះ ហើយក្នុងពេលដែលប្រធានាធិបតីអ៊ុយក្រែនកំពុងបំពេញទស្សនកិច្ចនៅ ចិនដូច្នេះទៀត ប្រសិនបើមានការចរចាជាយថាហេតុណាមួយ ជាមួយក្រុមប្រឆាំង ការចរចានោះប្រហែលជាពិបាកនឹងសំរេចបានណាស់៕ដោយ ព្រំ សឿន សូលីណា (RFI)