យុវជនម្នាក់ គំរាមសម្លាប់ម្តាយបើមិនទិញម៉ូតូ និងទូរស័ព្ទឲ្យ
ខេត្តកណ្តាល ៖ យុវជនម្នាក់ ដែលសមត្ថកិច្ចបានអះអាងថា ទើបចេញពីគុកជាងមួយខែ បានវាយបំផ្លិចបំផ្លាញទ្រព្យសម្បត្តិនៅក្នុងផ្ទះ និងគំរាមសម្លាប់ម្តាយបង្កើតបើមិនព្រមទិញម៉ូតូ និងទូរស័ព្ទឲ្យគេប្រើប្រាស់ ។
ហេតុ ការណ៍ខាងលើនេះបានកើតឡើង កាលពីវេលាម៉ោង១៦និង៣០នាទី ថ្ងៃទី២៧ ខែវិច្ឆិកា ឆ្នាំ២០១៣ ស្ថិតក្នុងភូមិតាខ្មៅ សង្កាត់/ក្រុងតាខ្មៅ ខេត្តកណ្តាល ក្រោយពីមានហេតុការណ៍កើតឡើង ម្តាយជនសង្ស័យបានប្តឹង នគរបាលក្រុងតាខ្មៅឲ្យជួយអន្តរាគមន៍ឃាត់ខ្លួនកូនប្រុសតិរច្ឆាន ដើម្បីចាត់ការតាមច្បាប់ ។
ជនសង្ស័យដែលត្រូវបានឃាត់ខ្លួនឈ្មោះ លុយ ដារី អាយុ២៦ឆ្នាំ បច្ចុប្បន្នស្នាក់នៅផ្ទះជាមួយឪពុកម្តាយក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ។ ម្តាយឈ្មោះ លុយ ផលលាង អាយុ៥៣ឆ្នាំ មុខរបរលក់ដូរ មានទីលំនៅភូមិ/សង្កាត់កើតហេតុខាងលើ ។
មន្ត្រីនគរបាលក្រុងតាខ្មៅបានឲ្យដឹងថា មុនពេលកើតហេតុ ជនសង្ស័យបានត្រឡប់មកពីផឹកស៊ីវិញ ក៏រក រឿងម្តាយហើយបានបោកចានឆ្នាំ និងទ្រព្យសម្បត្តិនៅក្នុងផ្ទះចោលបែករាយប៉ាយពេញផ្ទះ ។ មិនតែប៉ុណ្ណោះជនសង្ស័យខាងលើនេះបាននិយាយគំរាមសម្លាប់ម្តាយចោល បើមិនព្រមទិញម៉ូតូ និងទូរស័ព្ទឲ្យគេ។
បច្ចុប្បន្ន ជនសង្ស័យកំពុងស្ថិតនៅបន្ទប់ឃុំឃាំងរបស់អធិការដ្ឋាននករបាល ក្រុងតាខ្មៅ ដើម្បីរង់ចាំចាត់ការតាមនីតិវិធី ៕ Cambodia News
