ការយកតម្លៃផ្ញើកង់ ម៉ូតូ ខុសច្បាប់តាមទីផ្សារ
ភ្នំពេញ៖ សេចក្តីប្រកាស ដែលចេញដោយក្រុមអង្គការសង្គមស៊ីវិល ជាអ្នកឃ្លាំមើលអភិបាលកិច្ចនៅកម្ពុជា ចុះថ្ងៃទី២៨ ខែវិច្ឆិកា ឆ្នាំ២០១៣ ស្តីពីការយកតតម្លៃផ្ញើ កង់ ម៉ូតូ ដោយខុសច្បាប់ នៅតាមទីផ្សារ ដោយសំបុត្រផ្ញើម៉ូតូ តម្លៃត្រឹមតែ ៣០០ រៀល ប៉ុន្តែអ្នកយកលុយនៅកន្លែងផ្ញើម៉ូតូ តាមផ្សារទាំងអស់នៅភ្នំពេញ គឺយក ១.០០០ រៀល ក្នុងម៉ូតូមួយគ្រឿង។
សេចក្តីប្រកាសដដែល លើកឡើងថា “យើងជាអង្គការសង្គមស៊ីវិល ឃ្លាំមើលអភិបាលកិច្ចនៅកម្ពុជា សង្កេតឃើញថា ការទារយកតម្លៃលើសពីការកំណត់ដោយរដ្ឋទៅលើការផ្ញើកង់ម៉ូតូនៅតាម ទីផ្សារនានាកំពុងតែរីករាលដាលយ៉ាងខ្លាំងនិងពុំមានវិធានការ ផ្លូវច្បាប់ណាមួយឡើយ ទៅលើទង្វើខុសច្បាប់ទាំងអស់នេះ។
សេចក្តីប្រកាស លើកឡើងថា ជាក់ស្តែង តម្លៃដែលមន្ទីរសេដ្ឋកិច្ច និងហិរញ្ញវត្ថុ បានកំណត់ត្រឹមតែ ៣០០ រៀលប៉ុណ្ណោះ ក្នុងការផ្ញើម្តង តែ អាជីវករទាំងនោះ បែរជាទារយកពីម្ចាស់ កង់ ម៉ូតូ ក្នុងទឹកប្រាក់ចំនួនចាប់ពី ៥០០ ទៅ ១.០០០ រៀល និងពេលខ្លះឡើងដល់ ២.០០០ រៀលក៏មានដែរ។
សេចក្តីប្រកាស លើកឡើងថា ទង្វើបែបនេះ កំពុងតែនាំឲ្យមហាជនរាប់លាននាក់មានការមិនសប្បាយចិត្ត និងខឹងសម្បា ថែមទាំងអស់ជំនឿលើការអនុវត្តន៍នីតិរដ្ឋបាលសាធារណៈកម្ពុជាយ៉ាងខ្លាំង ។ អង្គការសង្គមស៊ីវិល ទទូចចង់បាននូវការចាត់វិធានការតាមផ្លូវច្បាប់ ប្រកបដោយប្រសិទ្ធភាពដោយក្រសួងសេដ្ឋកិច្ច និងហិរញ្ញវត្ថុ ដើម្បីស្តារឡើងវិញ នូវរបៀបរៀបរយ និងការអនុវត្តន៍ច្បាប់កម្ពុជា ចាប់ពីពេលនេះតទៅ៕ នាង/Cambodia News
