សន្និសីទីហ្សឺណែវលើកទី២ស្តីពីវិបត្តិស៊ីរីនឹងបើកធ្វើនៅថ្ងៃទី២២មករា
អស់រយៈពេល ជាង ៦ខែមកហើយ ដែលសហគមន៍អន្តរជាតិព្យាយាមស្វះស្វែងរៀបចំសន្និសីទក្រុងហ្សឺណែវ លើកទី២ ស្តីពីវិបត្តិស៊ីរី។ ទើបតែពេលនេះ ដែលគេអាចកំណត់ច្បាស់លាស់ អំពីកាលបរិច្ឆេទនៃសន្និសីទនេះ គឺថ្ងៃទី២២ ខែមករា ឆ្នាំ២០១៤ខាងមុខ។ នេះបើយោងតាមការប្រកាសរបស់លោកបាន គីមូន អគ្គលេខាធិការអ.ស.ប កាលពីថ្ងៃចន្ទ។
សន្និសីទ ក្រុងហ្សឺណែវលើកទី២ នៅថ្ងៃទី២២ មករា ឆ្នាំ២០១៤ ខាងមុខនេះគឺជាឱកាសដ៏កម្រមួយ សម្រាប់ឲ្យរដ្ឋាភិបាល និងក្រុមប្រឆាំងស៊ីរីអាចអង្គុយទល់មុខគ្នា ដើម្បីជជែកគ្នាស្វែងរកដំណោះស្រាយបញ្ចប់សង្រ្គាមស៊ីវិល ដែលអូសបន្លាយពេលជាង ២ឆ្នាំមកហើយ។
រុស្ស៊ី អាមេរិក និងបារាំង សុទ្ធតែបានថ្លែងគាំទ្រការបើកសន្និសីទក្រុងហ្សឺណែវលើកទី២នេះ។ ក៏ប៉ុន្តែ បើតាមលោកឡូរ៉ង់ ហ្វាប៊្យូស (Laurent Fabius) រដ្ឋមន្រ្តីក្រសួងការបរទេសបារាំង សន្និសីទីនេះ នឹងត្រូវបើកធ្វើ ដោយមិនមានវត្តមានលោកបាស្ហា អាល់អាសាដ ប្រធានាធិបតីស៊ីរីនោះទេ ហើយក៏គ្មានវត្តមានក្រុមប្រឆាំង ដែលមានប្រភពពីក្រុមភេរវជនអ៊ីស្លាមជ្រុលនិយមនោះដែរ។ ប្រមុខការទូតបារាំងបានពន្យល់ថា ការធ្វើបែបនេះ “គឺជាផ្លូវតែមួយគត់ ដើម្បីដោះស្រាយវិបត្តិស៊ីរី ដោយគ្មានវត្តមានលោកបាស្ហា អាល់អាសាដ និងដោយគ្មានវត្តមានក្រុមភេរវជន”។
ក្រុមប្រឆាំងស៊ីរី ឈ្មោះ National Coalition បានចេញសេចក្តីប្រកាសមួយ នៅថ្ងៃអង្គារនេះ ដោយបានស្វាគមន៍ការបើកធ្វើសន្និសីទក្រុងហ្សឺណែវលើកទី២ ហើយបានទទូចថា លោកបាស្ហា អាល់អាសាដ មិនត្រូវមានតួនាទីអ្វីទាំងអស់ នៅក្នុងនយោបាយស៊ីរី ទៅថ្ងៃអនាគត។
លោកឡាក់ដា ប្រាហ៊ីមី ប្រេសិតពិសេសរបស់អ.ស.ប និងសម្ព័ន្ធអារ៉ាប់វិញ បានឲ្យដឹងថា រហូតមកទល់នឹងពេលនេះ គេនៅមិនទាន់បានកំណត់ឲ្យបានច្បាស់លាស់នៅឡើយទេ អំពីបញ្ជីឈ្មោះអ្នកដែលត្រូវចូលរួម នៅក្នុងសន្និសីទក្រុងហ្សឺណែវ នៅខែមករាខាងមុខនេះ។
គេនៅតែមិនទាន់ដឹងច្បាស់នៅឡើយថា តើនៅក្នុងសន្និសីទនេះ នឹងមានវត្តមានអារ៉ាប៊ីសាអ៊ូឌីត និងអ៊ីរ៉ង់ដែរឬក៏យ៉ាងណា?ដោយ សេង ឌីណា(RFI)
