អ.ស.ប៖ កំណើនសេដ្ឋកិច្ចនៅក្នុងប្រទេសក្រីក្រមិនបានជួយបង្កើតការងារទេ
អង្គការ Cnuced របស់អង្គការសហប្រជាជាតិទើបបានចេញផ្សាយរបាយការណ៍ប្រចំាឆ្នំារបស់ ខ្លួននៅថ្ងៃពុធ ទី២០ វិច្ចិកា។ នៅក្នុងរបាយការណ៍នោះ Cnuced បានបញ្ជាក់ថា កំណើនសេដ្ឋកិច្ចដែលបណ្តាប្រទេសក្រីក្រជាងគេក្នុងលោកទទួលបាន មិនសូវបានចូលរួមបង្កើតការងារដើម្បីជួយកាត់បន្ថយចំនួន អ្នកអត់ ការងារធ្វើទេ។ ទន្ទឹមគ្នានេះ កំណើនចំនួនប្រជាជននៅក្នុងប្រទេសក្រីក្រមានសន្ទុះលឿងជាងប្រទេស កំពុងអភិវឌ្ឍទៅទៀត។
កំណើន ចំនួនប្រជាជននៅក្នុងបណ្តាប្រទេសក្រីក្រជាងគេក្នុងលោក គឺមានរហូតដល់ទៅ ២ដង ច្រើនជាងប្រទេសកំពុងអភិវឌ្ឍ និង ៥ដង ច្រើនជាងប្រទេសអភិវឌ្ឍ ពោលគឺមិនខុសនឹងសុភាសិតខ្មែរមួយដែលនិយាយថា ក្រហើយ កូនច្រើនទៀតនោះទេ។ ក្នុងឆ្នំា ២០១១ ចំនួនប្រជាជននៅក្នុងបណ្តាប្រទេសក្រីក្រជាងគេក្នុងលោកមានប្រមាណ ៨៥៨លាននាក់ ពោលស្មើនឹង ១២%នៃចំនួនប្រជាជនសរុបក្នុងលោក នេះបើយោងតាមរបាយការណ៍ប្រចំាឆ្នំារបស់អង្គការ Cnuced។ យោងតាមរបាយការណ៍ ចំនួនយុវជនគ្រប់អាយុធ្វើការនៅក្នុងបណ្តាប្រទេសក្រីក្រទំាងនេះ បានកើនចំនួន ១៦លាននាក់ក្នុងមួយឆ្នំា ហើយមាន១១ ប្រទេសក្នុងចំណោមប្រទេសក្រីក្រជាងគេក្នុងលោកទំាង ៤៩ប្រទេស ចំនួនយុវជនគ្រប់អាយុធ្វើការបានកើនរហូតដល់ទៅ ៥០០ ០០០នាក់ឯណោះក្នុងមួយឆ្នំា។
ជាមួយនឹងកំណើនចំនួនប្រជាជននេះ កំណើនសេដ្ឋកិច្ចរបស់បណ្តាប្រទេសក្រីក្រទំាងនេះក៏បានកើនជាមធ្យម ចំនួន ៧,២ ក្នុងមួយឆ្នំាចម្លោះឆ្នំា ២០០២ និង ២០០៨។ តែបញ្ហានៅត្រង់ថា កំណើនចំនួនការងារដែលបានបង្កើតឡើងក្នុងរយៈពេលនោះ គឺមានតែ ២,៩% ប៉ុណ្ណោះ។ អ៊ីចឹងហើយបានជាអគ្គនាយកអង្គការ Cnuced បានទាញសេចក្តីសន្និដ្ឋានថា កំណើនសេដ្ឋកិច្ចដែលបណ្តាប្រទេសក្រីក្រទំាងនោះទទួលបាន នៅមិនទាន់បានជួយបង្កើតការងារគ្រប់គ្រាន់ដើម្បីកាត់បន្ថយចំនួន អ្នកអត់ការងារធ្វើនៅឡើយទេ។
ជាក់ស្តែងប្រទេសអង់ហ្គូឡាដែលស្ថិតក្នុងចំណោមប្រទេសក្រីក្រជាងគេ ក្នុងលោក តែជាប្រទេសនំាប្រេងឆៅចេញទី២ ក្នុងទ្វីបអាហ្រ្វិក បានស្គាល់ផលិតផលសរុបក្នុងស្រុកសម្រាប់មនុស្សម្នាក់ៗកើនរហូតដល់ ទៅ ៩២% ក្នុងចន្លោះឆ្នំា ២០០២ និង ២០០៨ តែទន្ទឹមគ្នានេះ ចំនួនការងារបានធ្លាក់ចុះ ២,៣%។
យ៉ាងណាក៏ដោយ នាយកនៃកម្មវិធីរបស់អង្គការសហប្រជាជាតិទទួលបន្ទុកប្រទេសក្រីក្រ ជាងគេក្នុងលោកបានបញ្ជាក់ថា ការដែលកំណើនសេដ្ឋកិច្ចនៅក្នុងបណ្តាប្រទេសទំាងនេះមិនបានចូលរួម បង្កើតការងារនោះ មកពីរដ្ឋាភិបាលមិនបានយកប្រាក់ចំណូលទំាងនោះទៅធ្វើវិនិយោគបន្ថែម នៅក្នុងវិស័យចំាបាច់មួយចំនួន។ នាយកនៃកម្មវិធីរបស់អង្គការសហប្រជាជាតិទទួលបន្ទុកប្រទេសក្រីក្រ ជាងគេក្នុងលោករូបនោះដដែលបានអះអាងថា ការបង្កើតការងារនៅក្នុងប្រទេសទំាងនេះ គឺជាវិធានការបន្ទាន់ ព្រោះថា ចំនួនអ្នកអត់ការងារធ្វើក្នុងប្រទេសទំាងនេះ មាន ៦០% មានអាយុក្រោម ២៥ឆ្នំា មានន័យថា គេត្រូវបង្កើតឲ្យបានយ៉ាងតិច ៩៥លានការងារ ចាប់ពីពេលនេះ ទៅដល់ឆ្នំា ២០២០៕ (RFI)