គណបក្សប្រឆាំង ជួបជុំរម្លឹកខួប អ្នកស្លាប់ នៅកោះពេជ្រ
ភ្នំពេញ៖ នារសៀលម៉ោងជាង ៣រសៀល ថ្ងៃទី២១វិច្ឆិកានេះ ថ្នាក់ដឹកនាំ និងសកម្មជនគណបក្សសង្គ្រោះជាតិ ប្រមាណ ២០០ នាក់ បានជួបជុំនៅស្តូបរម្លឹកវិញ្ញាណក្ខន្ធអ្នកស្លាប់ នៅកោះពេជ្រ ដើម្បីប្រារព្ធពិធីបុណ្យរម្លឹកខួបអ្នកស្លាប់ នៅកោះពេជ្រ ក្នុងយប់បង្ហើយ នៃពិធីបុណ្យអុំទូក កាលពីថ្ងៃទី២២វិច្ឆិកា ឆ្នាំ២០១០។
-
ថ្នាក់ដឹកនាំ និងសកម្មជនគណបក្សសង្គ្រោះជាតិ និងយុវជន គណបក្សសង្គ្រោះជាតិ ជួបជុំរម្លឹកខួប អ្នកស្លាប់ នៅកោះពេជ្រ។ ពិធី ជួបជុំរបស់គណបក្សសង្គ្រោះជាតិ នារសៀលនេះ មិនមានការរារាំងទេ តែកម្លាំងប៉េអឹម ប៉ូលិស និងសន្តិសុខខណ្ឌ បានឈរត្រៀមត្រានៅកន្លែងប្រារព្ធពិធីនោះ តែមិនមានការរារាំង ឬក៏បំបែកពិធីជួបជុំរបស់គណបក្សប្រឆាំងទេ។
សូមរម្លឹកថា អាជ្ញាធររាជធានីភ្នំពេញ ក្រោមការដឹកនាំរបស់លោក ប៉ា សុជាតិវង្ស នៅព្រឹកថ្ងៃទី២២ ខែវិច្ឆិកា ឆ្នាំ២០១៣ ក៏គ្រោងនឹងជួបជុំរម្លឹកខួបគម្រប់ ៣ ឆ្នាំ ជូនដល់អ្នកស្លាប់នៅស្ពានកោះពេជ្រ កាលពីយប់ថ្ងៃបង្ហើយពិធីបុណ្យុំអុំទូក ថ្ងៃទី២២វិច្ឆិកា ឆ្នាំ២០១០។
ព្រឹត្តិការណ៍នៅលើស្ពានកោះពេជ្រ កាលពីយប់ថ្ងៃទី២២ ខែវិច្ឆិកា ឆ្នាំ២០១០ បានបណ្តាលឲ្យមានមនុស្សស្លាប់ ៣៥៣ នាក់ និងរបួសជិត ៥០០ នាក់។ អាជ្ញាធរ បានសាងសង់ស្តូបរម្លឹកវិញ្ញាណក្ខន្ធជូនដល់អ្នកស្លាប់ នៅកន្លែងកើតហេតុ។ ចំណែកស្ពានពេជ្រ ដែលកើតហេតុ ត្រូវបានវាយចោល បន្ទាប់ពីស្ពានពីរ នៅជិតនោះ ត្រូវបានសាងសង់រួចរាល់ កាលពីអំឡុងដើមឆ្នាំ២០១២៕ Cambodia News
