កម្ពុជា និងអាម៉េរិកបន្តពង្រឹងកិច្ចសហប្រតិបត្តិការទ្វេភាគី
ក្នុងជំនួបមួយរវាង រដ្ឋមន្រ្តីក្រសួងព័ត៌មាន លោក ខៀវ កាញ៉ារីទ្ធ និងជាអ្នកនាំពាក្យរាជរដ្ឋាភិបាលកម្ពុជា នៅថ្ងៃទី ២៨ មិថុនា ២០១២ ប្រមុខការទូតសហរដ្ឋអាម៉េរិកទើបទទួលតំណែងថ្មីបានថ្លែងបញ្ជាក់ពីជំហររបស់សហរដ្ឋអាម៉េរិក ក្នុងការបន្តពង្រឹងកិច្ចសហប្រតិបត្តិការជាមួយកម្ពុជា ដើម្បីភាពរុងរឿងនៃប្រទេសទាំងពីរ ទាំងក្នុងក្របខណ្ឌទ្វេភាគី និងពហុភាគី។
លោកលោក ខៀវ កាញារីទ្ធ រដ្ខមន្ត្រីក្រសួងព័ត៌មាន និយាយថា ក្រៅពីនេះលោកឯកអគ្គរាជទូត William Todd បានចោទសួរអំពីការផ្អាកកម្មវិធីផ្សាយបន្តផ្ទាល់នៃស្ថានីយវិទ្យុពីរ របស់សហរដ្ឋអាម៉េរិក គឺVOA និង RFA រយៈពេលពីរថ្ងៃនៅអំឡុងថ្ងៃបោះឆ្នោតក្រុមប្រឹក្សាឃុំសង្កាត់ផងដែរ។
លោក ខៀវ កាញារីទ្ធ បញ្ជាក់ថា ការផ្អាកនេះគឺដើម្បីធ្វើឱ្យថ្ងៃបោះឆ្នោតអាចចៀសវាងនូវបរិយាកាសអាប់អួរក៏ប៉ុន្តែវិទ្យុទាំងពីរនេះនៅតែអាចផ្សាយតាមរយៈប្រព័ន្ធ Shortwave និងអ៊ីនធើរណិតបានដដែល។ ប្រទេសកម្ពុជា កំពុងស្នើរដ្ឋាភិបាលអាម៉េរិក ឲ្យលប់ចោលបំណុលជំពាក់ដោយអតីតរដ្ឋាភិបាលលន់ណុលគាំទ្រដោយសហរដ្ឋអាម៉េរិកជំនាន់នោះ ដោយបង្វែរជាជំនួយអភិវឌ្ឍន៍វិញ៕