អ្នកតំណាងរាស្ត្រស៊ីរីម្នាក់ត្រូវក្រុមឧទ្ទាមជីហាដចាប់ជាចំណាប់ខ្មាំង និងសម្លាប់ចោល
លោក ម៉ុកហេម អាល់សាហ៊ូ Mojhem al-Sahou ជាអ្នកតំណាងរាស្ត្រស៊ីរីម្នាក់ ត្រូវបានក្រុមឧទ្ទាមជីហាដចាប់ធ្វើជាចំណាប់ខ្មាំង និងសម្លាប់លោកចោល។ នេះបើយោងតាមអង្គការអង្កេតការណ៍សិទ្ធិមនុស្សស៊ីរី នៅថ្ងៃអាទិត្យនេះ។ សភាស៊ីរីបានគូសបញ្ជាក់ថានេះជាព័ត៌មានពិត ប៉ុន្តែមិនបានប្រាប់ពីអត្តសញ្ញាណនៃក្រុមឃាតករនោះទេ។
នៅថ្ងៃអាទិត្យម្សិលមិញ យោងតាមអង្គការអង្កេតការណ៍សិទ្ធិមនុស្សស៊ីរី តំណាងរាស្ត្រស៊ីរីម្នាក់ គឺលោក ម៉ុកហេម អាល់សាហ៊ូ Mojhem al-Sahou ត្រូវបានក្រុមឧទ្ទាមជីហាដចាប់ធ្វើជាចំណាប់ខ្មាំង និងបានសម្លាប់លោកចោល។ ប្រភពព័ត៌មានរបស់សភាស៊ីរីបានគូសបញ្ជាក់ពីការពិតនៃព័ត៌មាននេះ ហើយបានប្រាប់ថា លោកអាល់សាហ៊ូ ត្រូវបានឃាតករសម្លាប់នៅក្រុង Deir Ezzour ឌែរ អេហ្ស៊ួរ ភាគខាងកើតប្រទេស។ ប៉ុន្តែសភាស៊ីរីមិនបានប្រាប់ពីអត្តសញ្ញាណនៃក្រុមឃាតករនោះទេ។
យោងតាមគេហទំព័ររបស់វិទ្យុIRIB ដែលជាវិទ្យុផ្នែកភាសាបារាំងមួយនោះ នៅខែវិច្ឆិកានេះ ក្រុមឧទ្ទាមបានចាប់លោកអាល់សាហ៊ូ នៅពេលដែលលោកធ្វើដំណើរទៅក្រុងដាម៉ាស ហើយក្រុមនោះគឺជាក្រុមឧទ្ទាមរដ្ឋអ៊ីស្លាមអ៊ីរ៉ាក់។ លោកអាល់សាហ៊ូជាអ្នកតំណាងរាស្ត្រដែលបានជាប់ឆ្នោតកាលពីឆ្នាំ២០១២។ កាលពីថ្ងៃ២៧តុលា កន្លងទៅ តំណាងរាស្ត្រស៊ីរីម្នាក់ផ្សេងទៀតក៏ត្រូវបានក្រុមឧទ្ទាមជីហាដ ចាប់ជា ចំណាប់ខ្មាំងនៅភាគខាងកើតស៊ីរីដែរ។ គួរបញ្ជាក់ថា ក្រៅពីក្រុងធំៗនៅភាគខាងកើត កន្លែងផ្សេងទៀតនៅភាគខាងកើតប្រទេសនេះ ស្ថិតនៅក្រៅការគ្រប់គ្រងសន្តិសុខរបស់រដ្ឋាភិបាលស៊ីរី។
រដ្ឋាភិបាលស៊ីរីនៅតែបន្តការប្រយុទ្ធជាមួយក្រុមឧទ្ទាមជានិច្ច។ ក្រុមឧទ្ទាមស៊ីរីដែលជាក្រុមជ្រោមជ្រែងដល់សម្ព័ន្ធប្រឆាំងនោះ ទើបតែដណ្តើមបានមូលដ្ឋានយោធាភាគច្រើន នៅភាគខាងជើងប្រទេសជិតអាកាសយានដ្ឋានក្រុងអាឡេប។
ដោយឡែកក្រុមប្រឆាំងស៊ីរីទាំងនេះនៅតែបង្ហាញជំហរប្រុងប្រយ័ត្នចំពោះ ការចូលរួមជា យថាហេតុណាមួយរបស់ក្រុមខ្លួន ក្នុងសន្និសីទក្រុងហ្សឺណែវស្តីពីដំណោះស្រាយវិបត្តិស៊ីរី។ នៅក្នុងកិច្ចប្រជុំនៅតួកគី សម្ព័ន្ធបក្សប្រឆាំងស៊ីរីត្រូវការការយល់ព្រមពីសកម្មជនខ្លួនដែល កំពុងតស៊ូ នៅស៊ីរីសិន ថាតើពួកគេអនុញ្ញាតអោយសម្ព័ន្ធប្រឆាំងចូលរួមសន្និសីទនោះដែររឺ យ៉ាងណា ដើម្បីអោយការចូលរួមរបស់ខ្លួនមាន ភាពត្រឹមត្រូវពេញលេញ៕ដោយ ព្រំ សឿន សូលីណា (RFI)
