ទាហានបង់ក្លាដែស១៥០នាក់ទទួលទោសប្រហារជីវិត ពីបទបានចូលរួមអំពើបះបោរឆ្នាំ២០០៩
នៅថ្ងៃអង្គារនេះ សារព័ត៌មានបារាំង AFP បានប្រាប់ថា តុលាការបង់ក្លាដែសបានសំរេចដាក់ទោសប្រហារជីវិតដល់ទាហានយ៉ាងហោចណាស់ ១៥០នាក់ ពីបទបានចូលរួមធ្វើកុបកម្មបះបោរ កាលពីឆ្នាំ២០០៩។ ការបះបោរកាលណោះ បានសម្លាប់នាយទាហានជាច្រើនរូប។
តុលាការ ក្រុងដាកា ប្រទេសបង់ក្លាដែស បានសំរេចកាត់ទោសប្រហារជីវិតទាហានយ៉ាងហោចក៏១៥០នាក់ដែរ ពីបទចូលរួមកុបកម្មបះបោរឆ្នាំ២០០៩ ដែលកុបកម្មនាពេលនោះ បានសម្លាប់នាយទាហានជាច្រើនរូប។ នេះបើយោងតាមកាសែតបារាំង អាអេហ្វប៉េ AFP ដែលបានទទួលព័ត៌មានផ្ទាល់ពីរដ្ឋអាជ្ញាបង់ក្លាដែស បាហារុល អ៊ីស្លាម នៅតុលាការក្រុងដាកា។
ក្នុងចំណោមជនជាប់ចោទ៨២៣រូប មានទាហានប្រមាណ៣៥០នាក់ទៀត បានទទួលទោសជាប់ពន្ធនាគាររហូតដល់១៤ឆ្នាំ។ យោងតាមបទចោទប្រកាន់ ទាហានដែលបានទទួលទោសប្រហារជីវិតទាំងនោះ ជាប់ទោសពីបទបានសំលាប់មនុស្ស ធ្វើទារុណកម្ម និងចូលរួមដៃជើង ក្នុងអំពើបះបោរកាលពីឆ្នាំ២០០៩។
គួររំលឹកថា កាលពីថ្ងៃ២៥កុម្ភៈ ឆ្នាំ២០០៩ កងការពារត្រួតពិនិត្យព្រំដែនប្រទេសបង់ក្លាដែសបានរងនូវអំពើបះបោរ មួយ ដែលមានរយៈពេលរហូតជាង៣០ម៉ោង។ យោងតាមការស៊ើបអង្កេត ទាហានដែលបះបោរទាំងនោះ មានការធុញថប់និងខឹងសម្បារ ដោយសារតែពួកគេមិនបានទទួលការដំឡើងប្រាក់ខែដូចដែលបានទាមទារ ហើយជីវភាពប្រចាំថ្ងៃរបស់ពួកគេទៀតសោត មិនបានប្រសើរជាងមុនសោះឡើយ។
កុបករបះបោរបានលួចយកអាវុធប្រមាណជា២៥០០ ដើម ហើយបានចូលទៅបង្កការរាំងស្ទះដល់កិច្ចប្រជុំប្រចាំឆ្នាំរបស់ អ្នកទទួលខុសត្រូវនៃកងត្រួតពិនិត្យព្រំដែន និងបានសំលាប់អ្នកទទួលខុសត្រូវទាំងនោះ។ កាលណោះ នាយទាហានយ៉ាងហោច៥៧នាក់ បានត្រូវសម្លាប់ ហើយសាកសពរបស់ពួកគេត្រូវបានកាត់ជាដុំៗ និងយកទៅទំលាក់ក្នុងលូទឹក និងរណ្តៅផ្សេងៗ។
បើគិតសរុបទៅ មានមនុស្ស៧៤នាក់បានត្រូវសម្លាប់ ជនរងគ្រោះភាគច្រើនស្លាប់ដោយរងការធ្វើទារុណកម្ម រឺក៏ត្រូវបានដុតទាំងរស់តែម្តង។ សកម្មភាពបះបោរនេះ ជាសកម្មភាពបះបោរយោធាសំខាន់ជាងគេបំផុត ក្នុងប្រវត្តិសាស្ត្រប្រទេសបង់ក្លាដែស៕ដោយ ព្រំ សឿន សូលីណា (RFI)
