ទឹកជំនន់វាយប្រហារប្រទេសថៃ បង្កឲ្យមនុស្សជិត២លាននាក់ទទួលរងផលប៉ះពាល់
សារព័ត៌មាន Cambodia News/
ថៃ (២៤ មករា ២០១៧) ៖ នាយកដ្ឋានការពារគ្រោះមហន្តរាយ និងឧតុនិយមប្រទេសថៃបានរាយការណ៍នៅថ្ងៃទី២៣ ខែមករា ឆ្នាំ២០១៧នេះ ឲ្យដឹងថា ទឹកជំនន់ដែលបានវាយប្រហារមកលើតំបន់ភាគខាងត្បូងប្រទេសថៃចាប់តាំងពីថ្ងៃទី០១ ខែធ្នូ ឆ្នាំ២០១៦កន្លងទៅមកនោះ បានបង្កឲ្យខេត្ត Prachuap Khiri Khan និងបណ្តាខេត្តចំនួន១១ទៀតទទួលរងផលប៉ះពាល់យ៉ាងខ្លាំង ក្នុងនោះមនុស្សចំនួន៨៥នាក់ បានស្លាប់ និងចំនួន៤នាក់ទៀតបានបាត់ខ្លួននៅឡើយ
សេចក្តីរាយការណ៍បានឲ្យដឹងថា ថ្វីដ្បិតស្ថានភាពទឹកជំនន់នៅបណ្តាខេត្តមួយចំនួនដូចជា ខេត្ត Ranong ខេត្ត Kribi ខេត្ត Trang ខេត្ត Prachuap Khiri Khan និងខេត្ត Chumphon បានធូរស្រាលមកវិញ ប៉ុន្តែបណ្តាខេត្តមួយចំនួនទៀតដូចជា ខេត្ត Nakhon Si Thammarat ខេត្ត Surat Thani ខេត្ត Phatthalung ខេត្ត Yala ខេត្ត Songkhla ខេត្ត Narashiwat និងខេត្ត Pattani នៅបន្តការជន់លិចនៅឡើយ ដែលបណ្តាលឲ្យមនុស្សចំនួន១,៧លាននាក់ បានទទួលរងផលប៉ះពាល់ ព្រមទាំងហេដ្ឋារចនាសម្ព័ន្ធផ្សេងទៀត៕
