មួយភាគបួននៃយុវជនអូស្ត្រាលីមិនធ្វើការឬមិនសិក្សាពេញពេល
មានរបាយការណ៍បង្ហាញថា យុវជនអូស្ត្រាលីកាន់តែច្រើនឡើង បានបំពេញការសិក្សាចប់ថ្នាក់ទី១២ ក៏ប៉ុន្តែបន្ទាប់ពីបញ្ចប់ថ្នាក់ទី១២ យុវជនជាង មួយភាគបួន មិនបានបន្តការសិក្សា ឬក៏បម្រើការងារពេញពេលនោះទេ។
របាយការណ៍ចុងក្រោយស្តីអំពីការអប់រំនិងជំនាញ របស់ក្រុមប្រឹក្សាកំណែទម្រង់ក្រុមប្រឹក្សានៃរដ្ឋាភិបាល អូស្ត្រាលី បង្ហាញថាយុវជនមួយចំនួន មិនបានចេញពីវិទ្យាល័យ រួចចូលទៅធ្វើការ ឬបន្តការសិក្សានៅមហាវិទ្យាល័យ ដោយរលូនឡើយ។
នាយករងនៃក្រុមប្រឹក្សានេះ លោកសាស្ត្រាចារ្យ Greg Craven មានប្រសាសន៍ថា ក្នុងឆ្នាំ២០១១ យុវជនអូស្ត្រាលីអាយុពី១៧ ទៅ២៤ឆ្នាំ ជាង២៧% មិនបានធ្វើការ ឬសិក្សាពេញពេលនោះទេ ដោយសារតែការធ្លាក់ចុះនៃតម្រូវការបុគ្គលិកពេញពេលនៅតាម កន្លែងធ្វើការផ្សេងៗ។
រីឯ យុវជនមកពីគ្រួសារក្រីក្រឬគ្រួសារជួបឧសគ្គវិញ របាយការណ៍បង្ហាញថា ៤០% នៃយុវជនទាំងនោះមិនបានបន្តការសិក្សា ឬក៏បំពេញការងារនោះទេ៕ (Radio Australia)
