គណបក្សប្រជាជនកម្ពុជាត្រៀមខ្លួនចរចាទ្បើងវិញជាមួយគណបក្សសង្គ្រោះជាតិ
ភ្នំពេញ៖ នៅថ្ងៃទី២៨ ខែតុលា នេះ មន្ត្រីជាន់ខ្ពស់គណបក្សប្រជាជនកម្ពុជាបានឲ្យដឹងថា គណបក្សប្រជាជនកម្ពុជា ត្រៀមខ្លួនរួចជាស្រេច សម្រាប់កិច្ចចរចាទ្វេភាគីលើកទី៣ ជាមួយគណបក្សសង្គ្រោះជាតិ ដើម្បីដោះស្រាយវិបត្តិនយោបាយ ដែលនៅសេសសល់ ក្រោយការបោះឆ្នោតនៅកម្ពុជា។
តំណាងរាស្ត្រគណបក្សប្រជាជនកម្ពុជា និងជារដ្ឋមន្ត្រីក្រសួងមហាផ្ទៃ លោក ស ខេង មាន ប្រសាសន៍ថា គណបក្សប្រជាជនកម្ពុជា ឈរលើគោលការណ៍លទ្ធិប្រជាធិបតេយ្យ គោរពតាមឆន្ទៈប្រជាពលរដ្ឋ ដើម្បីចរចាជាថ្មី ជាមួយគណបក្សសង្គ្រោះជាតិ តាមការជំរុញរបស់សហគមន៍បរទេស។
លោក បញ្ជាក់ថា ការបោះឆ្នោតនៅកម្ពុជា បានបញ្ចប់ ដោយមានការទទួលស្គាល់ពីសហគមន៍អន្តរជាតិ ហេតុដូចនេះ កិច្ចចរចារវាងគណបក្សទាំងពីរ ត្រូវធ្វើទ្បើងវិញ ដើម្បីជៀសវាងបង្កផលប៉ះពាល់ដល់ប្រជាពលរដ្ឋ។
អនុប្រធានគណបក្សសង្គ្រោះជាតិ លោក កឹម សុខា ឲ្យដឹងថា គណបក្សសង្គ្រោះជាតិ នឹងមិនចូលរួមចរចាជាថ្មីឡើយ ប្រសិនបើភាពមិនប្រក្រតីនៃការបោះឆ្នោតមិនទាន់ត្រូវបានដោះស្រាយ។ លោកបញ្ជាក់ថា ក្រោយមហាបាតុកម្មលើកទី៣ គណបក្សសង្គ្រោះជាតិនឹងបន្តយន្តការស្វែងរកអន្តរាគមន៍ពីបរទេស តាមរយៈការប្រមូលស្នាមមេដៃប្រជាពលរដ្ឋឲ្យបានច្រើន ដើម្បីជំរុញឲ្យរដ្ឋាភិបាលកម្ពុជា ទទួលស្គាល់ឆន្ទៈប្រជាពលរដ្ឋ
ក្រោយមហាបាតុកម្មលើកទី៣ ពីថ្ងៃទី២៣ ដល់ថ្ងៃទី២៥ ខែតុលា ប្រធានគណបក្សសង្គ្រោះជាតិ លោក សម រង្ស៊ី អះអាងថា គណបក្សឈប់និយាយពីការចរចារកតំណែងក្នុងរដ្ឋសភា ជាមួយគណបក្សប្រជាជនកម្ពុជាហើយ។ ប៉ុន្តែលោកក៏មិនច្រានចោលនូវកិច្ចចរចានយោបាយណាមួយទ្បើយ ប្រសិនបើការចរចានោះធ្វើទ្បើងប្រកបដោយតម្លាភាព ពោលគឺត្រូវចាក់ផ្សាយជូនពលរដ្ឋឲ្យបានដឹង៕ Cambodia News
