គណបក្សសង្គ្រោះជាតិ ទាមទារឲ្យ គជប លើកពេលឬពន្យារពេលការពិនិត្យ និងចុះឈ្មោះបោះឆ្នោត
ភ្នំពេញ៖ នៅក្នុងសេចក្តីថ្លែងការណ៍របស់គណបក្ស សង្គ្រោះជាតិ ចេញផ្សាយនៅថ្ងៃទី០១ខែតុលានេះ បានសរសេរថា គណបក្សសង្គ្រោះជាតិ ទាមទារឲ្យមានការកែទម្រង់ស៊ីជម្រៅទាក់ទងនឹងការបោះឆ្នោត ដែលគណបក្សទាំងពីរ គឺគណបក្សសង្គ្រោះជាតិ និងគណបក្សប្រជាជនកម្ពុជា ដែលមានអសនៈក្នុងសភា ត្រូវពិភាក្សាគ្នានៅពេលខាងមុខ។
សេចក្តីថ្លែងការណ៍ បន្តថា នៅចំពោះមុខ គណបក្សសង្គ្រោះជាតិ ទាមទារឲ្យលើកពេល ឬពន្យារពេល ការពិនិត្យបញ្ជីឈ្មោះ និងចុះឈ្មោះបោះឆ្នោត ដែលគណៈកម្មាធិការជាតិរៀបចំការបោះឆ្នោត បានកំណត់ធ្វើចាប់ពីថ្ងៃទី០១ដល់ថ្ងៃទី២០ ខែតុលា ឆ្នាំ២០១៣ ព្រោះជារដូវវស្សា ហើយពលរដ្ឋកំពុងរងគ្រោះដោយសារទឹកជំនន់។
គណៈកម្មាធិការជាតិរៀបចំការបោះឆ្នោត (គជប) បានប្រកាសថា ការពិនិត្យបញ្ជីឈ្មោះអ្នកបោះឆ្នោត និងចុះឈ្មោះបោះឆ្នោត សម្រាប់នីតិកាលថ្មី មានតែរយៈពេល២០ថ្ងៃប៉ុណ្ណោះ ចាប់ពីថ្ងៃទី០១ខែតុលាទៅ ដោយបានអំពាវនាវឲ្យប្រជាពលរដ្ឋទាំងអស់ ដែលមានអាយុគ្រប់បោះឆ្នោត ទៅចុះឈ្មោះ ឬទៅពិនិត្យបញ្ជីឈ្មោះរបស់ខ្លួនឡើងវិញ នៅតាមឃុំសង្កាត់ដែលខ្លួនរស់នៅ ។
គជប ឲ្យដឹងទៀតថា ការពិនិត្យនិងចុះឈ្មោះនេះ នឹងត្រូវបិទបញ្ចប់នៅថ្ងៃទី២០ខែតុលា និងទុកពេលឲ្យប្តឹងតវ៉ា និងដោះស្រាយទៅក្រុមប្រឹក្សាឃុំសង្កាត់ និងក្រុមប្រឹក្សាធម្មនុញ្ញ ចាប់ពីថ្ងៃទី២៤ខែតុលា រហូតដល់ថ្ងៃទី២៦ខែវិច្ឆិកា។
ម៉្យាងវិញទៀត គ.ជ.ប គ្រោងនឹងបិទផ្សាយព្រមគ្នានៃបញ្ជីបោះឆ្នោតដំបូងនៃឃុំ-សង្កាត់ ដែលគ្មានបណ្តឹងតវ៉ា នៅថ្ងៃទី២៥ខែតុលា ហើយទុករយៈពេលឲ្យប្តឹងតវ៉ាទៅស្ថាប័នពាក់ព័ន្ធប្រឆាំងនឹង បញ្ជីឈ្មោះបោះឆ្នោតនេះ ចាប់ពីថ្ងៃទី៣១ ខែតុលា ដល់ថ្ងៃទី៣១ ខែធ្នូ ឆ្នាំ២០១៣៕ Cambodia News
