វត្ថុសិល្បៈទំហំយក្ស ត្រៀមដាក់តាំងអបអរអង្គរសង្ក្រាន្ដ បានដឹកមកដល់ ខេត្តសៀមរាបហើយ
សារព័ត៌មាន Cambodia News/
សៀមរាប (២៣ មីនា ២០១៥) ៖ តាមការបញ្ជាក់ឲ្យដឹង ពីអាជ្ញាធរជាតិអប្សរា វត្ថុសិល្បៈខ្នាតយក្ស ជាច្រើនមុខ ដែលត្រៀមសំរាប់ដាក់តាំង ដើម្បីអបអរសាទរ ក្នុងព្រឹត្តិការណ៍ អង្គរសង្គ្រានឆ្នាំ ២០១៥ ខាងមុខ ដែលគ្រោងធ្វើនៅក្នុងឱកាស ពិធីបុណ្យចូលឆ្នាំ បានដឹកមកដល់ ខេត្តសៀមរាបរួចហើយ។
វត្ថុសិល្បៈខ្នាតធំ ឬហៅថា ខ្នាតយក្សនោះ គឺត្រូវបានរៀបចំឡើងដោយ សហភាពសហពន្ធ័យុវជនកម្ពុជា ហើយបានដឹកមកដាក់ទុក នៅកន្លែងសុវត្ថិភាព ក្នុងការិយាល័យធ្វើការរបស់ អគ្គនាយកដ្ឋានអាជ្ញាធរជាតិអប្សរា នៃ ខេត្តសៀមរាប ។
វត្ថុសិល្បៈខាងលើ មានចំនួន៣មុខ ក្នុងនោះមាន អង្រុតយក្ស កន្ត្រងប្រហុកយក្ស និងមួកយក្ស និងនៅសល់បំពងទឹកត្នោត ខ្នាតយក្សមួយទៀត ដែលនឹងដឹកមកដល់ នាពេលខាងមុខ ព្រោះ ថាបច្ចុប្បន្នកំពុងតែផលិត មិនទាន់រួចរាល់នៅឡើយ។
សូមបញ្ជាក់ថា ដើម្បីចូលរួមក្នុងការបង្កើត ភាពសប្បាយរីករាយ ក្រោមរូបភាពថ្មី ហើយប្លែក សហភាពសហ ពន្ធ័យុវជនកម្ពុជា បានរៀបចំព្រឹត្តិការណ៍ អង្គរសង្គ្រាននេះ ឡើងសារជាថ្មីម្តងទៀត ហើយនេះក៏ជាលើកទី៣ហើយ ដែលសហភាពសហពន្ធ័យុវជនកម្ពុជា បានរៀបចំ កម្មវិធីកំសាន្តសប្បាយ នៅតំបន់ទេសចរណ៍ ប្រវត្តិសាស្ត្រប្រាសាទ អង្គរវត្ត៕
