ផ្លូវនៅទូទាំងរាជធានីភ្នំពេញ ត្រូវកកស្ទះយ៉ាងខ្លាំងនៅថ្ងៃបើកសម័យប្រជុំសភាអាណត្តិថ្មីដំបូង
ភ្នំពេញ៖ ផ្លូវនៅទូទាំងរាជធានីភ្នំពេញ ត្រូវកកស្ទះយ៉ាងខ្លាំង ដោយកងកម្លាំងសមត្ថកិច្ចបានដាក់ពង្រាយរនាំងដែក បន្លាលួសបិទផ្លូវមួយចំនួន នៅចំថ្ងៃបើកសម័យប្រជុំរដ្ឋសភាដំបូង ដែលមានតែតំណាងរាស្ត្រជាប់គណបក្សប្រជាជនកម្ពុជា និងបណ្តាអង្គទូតមួយចំនួនចូលរួម ក្រោមអធិបតីភាព ព្រះមហាក្សត្រនៃព្រះរាជាណាចក្រកម្ពុជា។
ការបិទផ្លូវនេះ ត្រូវបានមន្ត្រីកងកម្លាំងសមត្ថកិច្ចអះអាងថា ដើម្បីរឹតបន្តឹងសន្តិសុខ សម្រាប់កិច្ចប្រជុំសភាលើកដំបូង។
ផ្លូវនៅម្តុំវិមានឯករាជ្យ រដ្ឋសភា វត្តភ្នំ និងជាពិសេសមហាវិថី ព្រះនរោត្តម និងសុធារស ត្រូវបានសមត្ថកិច្ចដាក់រនាំងបន្លាលួស បិទផ្លូវគ្រប់ច្រកល្ហក ដែលបណ្តាឲ្យបុគ្គលិកក្រុមហ៊ុន និងអ្នករកស៊ីនៅម្តុំនោះមិនអាចចូលទៅធ្វើការ និងរកស៊ីបាន។
សូម្បីតែវត្តអារ៉ាមនៅម្តុំនោះ ក៏ត្រូវបានសមត្ថកិច្ចដាក់រនាំងបន្លាលួសមុខវត្តដែរ ខណៈពេលវត្តអារ៉ាមនៅពេលនេះ កំពុងប្រារព្ធពិធីបុណ្យកាន់បិណ្ឌ ដែលជាបុណ្យប្រពៃណីធំមួយនៅប្រទេសកម្ពុជា។
អ្នកលក់នៅផ្សារកាប់គោមួយចំនួនតូច ដូចជា ត្រី សាច់ បន្លែរ ត្រូវបង្ខំចិត្តយកឥវ៉ាន់របស់ខ្លួនមកលក់នៅក្រៅផ្សារ ដោយសារសមត្ថកិច្ចហាមមិនឲ្យទាំងអ្នកលក់ និងអ្នកទិញចេញចូលឡើយ។ ផ្លូវតូចៗផ្សេងទៀត ត្រូវរងការកកស្ទះទាំងអស់៕ នាង/Cambodia News
