ស្រ្តីពោះធំគ្រប់ខែម្នាក់ ត្រូវប្តីចាក់សាំងដុតទាំងរស់
ភ្នំពេញ: ប្តីកំណាចឃោរឃៅម្នាក់ បានខឹងនឹងប្រពន្ធទៅមើលទូរទស្សន៍ នៅផ្ទះម្តាយក្មេក ត្រលប់មកវិញ ក៏មានការឈ្លោះប្រកែកគ្នា ពេលនោះប្តីទុរយសបានយកសាំងប្រហែល ៥ លីតទុកនៅក្រៅផ្ទះ មកស្រោចលើប្រពន្ធហើយបានដុតទាំងរស់តែម្តង។
អំពើព្រៃផ្សៃនេះបានកើតឡើងនៅយប់ថ្ងៃទី១៤ ខែកញ្ញា ឆ្នាំ២០១៣ នៅចំណុច ភូមិជ្រាវ ឃុំអមលាំង ស្រុកថ្ពង ខេត្តកំពង់ស្ពឺ ហើយពេលនេះកំពុងព្យាបាលជំងឺនៅមន្ទីរពេទ្យលោកសង្ឃ។
ប្រភពព័ត៌មានពី ស្ត្រីឈ្មោះ ពេជ្រ សិទ្ធ ត្រូវជាបងបង្កើតរបស់ជនរងគ្រោះបានឲ្យដឹងថា ស្ត្រីរងគ្រោះមានឈ្មោះ ពេជ្រ សុខ អាយុ២៥ ឆ្នាំ ( ពោះធំគ្រប់ខែ ) ចំណែកប្តីឃោរឃៅឈ្នោះ ម៉ុន ភារម្យ អាយុ២៧ ឆ្នាំ មុខរបរជាកម្មករសេរី ស្នាក់នៅភូមិឃុំកើតហេតុខាងលើ។ស្ត្រីជាបងនារី រងគ្រោះ បានបន្តថា មូលហេតុដែលនាំឲ្យមានការប្រទូស្តរាយគ្នានេះ ដោយសារតែប្តីដ៏ឃោរឃៅនេះ បង្កជម្លោះជាមួយប្រពន្ធនៅពេលដែលនាងត្រលប់មកពីមើលទូរទស្សន៍វិញ ខណៈនោះគេក៏បានយកសាំងមួយកូនប៊ីដុងមកចាក់ស្រោចលើខ្លួនជនរងគ្រោះ ហើយយកដែកកេះដុតបណ្តាលឲ្យឆេះពេញ ខ្លួនតែម្តង។
គេនៅមិនទាន់បានដឹងទេថា វាសនាជនរងគ្រោះយ៉ាងណានោះទេនៅពេលដ៏ខ្លីខាងមុខនេះ រហូតមកដល់ពេលនេះ មានសប្បុរសជនជាច្រើនលោកបានមកជួយបរិច្ចាកក្នុងនាមមនុស្សធម៌៕ Cambodia News
