ការខ្ជះខ្ជាយចំណីអាហារប៉ះពាល់ខ្លាំងដល់បរិដ្ឋាន
នៅថ្ងៃពុធនេះ អង្គការទទួលបន្ទុកកសិកម្ម និងម្ហូបអាហារនៃអង្គការសហប្រជាជាតិ ហៅកាត់ថា FAO បានបង្ហាញរបាយការណ៍មួយ ស្តីពីការខ្ជះខ្ជាយចំណីអាហារដែលមិនត្រឹមតែធ្វើអោយបាត់ប្រាក់ចំណូល ប៉ុណ្ណោះទេ ថែមទាំងផ្តល់ផលប៉ះពាល់ដល់បរិដ្ឋាន ហើយអ្នកដែលរងគ្រោះនោះ គឺកូនចៅជំនាន់ក្រោយនេះឯង។
យោងតាម របាយការណ៍អង្គការFAO លើកឡើងនៅថ្ងៃពុធម្សិលមិញនេះ ជារៀងរាល់ឆ្នាំ មានចំណីអាហារបិរមាណជាងមួយពាន់លានតោន ត្រូវបានគេខ្ជះខ្ជាយលែងប្រើប្រាស់។ បើគិតជាទឹកប្រាក់ គឺមានដល់ទៅ៧៥០ពាន់លានដុល្លារឯណោះ ដែលមនុស្សយើងបានបោះចោលទៅក្នុងធុងសំរាម។ ដោយឡែក នៅពេលដែលយើងខ្ជះខ្ជាយចំណីអាហារដ៏សន្ធឹកសន្ធាប់បែបនេះ នៅលើពិភពលោកទាំងមូល មានមនុស្ស៨៧០លាននាក់ កំពុងតែខ្វះខាតរកអ្វីហូបគ្មាន។
ការខ្ជះខ្ជាយនេះមិនត្រឹមតែ បានធ្វើអោយបាត់បង់ប្រាក់កាសប៉ុណ្ណោះ ទេ ថែមទាំងបានបង្កផលប៉ះពាល់ធ្ងន់ធ្ងរដល់បរិដ្ឋាន ដល់សុវត្ថិភាពចំណីអាហារ និងសុវត្ថិភាពទូទៅផងដែរ។ ជារៀងរាល់ឆ្នាំ ចំណីអាហារដែលមិនបានបរិភោគទាល់តែសោះ បានរលាយទៅជាទឹក ដែលជាមូលហេតុនៃការបញ្ចេញឧស្ម័នផ្ទះកញ្ចក់ ទៅក្នុងបរិយាកាស ក្នុងបរិមាណរហូតជាង៣ពាន់លានតោន។ នេះជាការប៉ះពាល់បរិដ្ឋានកម្រិតខ្ពស់ ដែលអ្នកដែលរងគ្រោះនោះ គឺកូនចៅជំនាន់ក្រោយរបស់យើងគ្រប់គ្នានេះហើយ។
នៅតាមប្រទេសឧស្សាហកម្មធំៗ ដូចជា ចិន ជប៉ុន និងកូរ៉េខាងត្បូង ប្រជាជនម្នាក់បានខ្ជះខ្ជាយចំណីអាហារជិត២០០គីឡូក្រាម ក្នុងមួយឆ្នាំ។ រីឯប្រទេសកំពុងអភិវឌ្ឈន៍វិញ ច្រើនរងការខាតបង់ចំណីអាហារ នៅក្នុងដំណើរការផលិតផ្នែកកសិកម្ម។ រីឯនៅតាមតំបន់ដែលប្រជាជនមានប្រាក់ចំណូលរាងខ្ពស់បន្តិចនោះ ច្រើនមានការខ្ជះខ្ជាយនៅពេលលក់ដូរ រឺក៏បង្កដោយអ្នកទទួលទានចំណីអាហារផ្ទាល់តែម្តង។ ផ្ទុយទៅវិញ ម្ហូបអាហារដែលខ្ជះខ្ជាយនៅទូទាំងពិភពលោកត្រឹមតែបរិមាណ ១ភាគ ៣ប៉ុណ្ណោះ គឺអាចជួយសង្គ្រោះជនរងគ្រោះដោយការអត់ឃ្លាន បានដល់៨៧០លាននាក់។
ដើម្បីទប់ស្កាត់បញ្ហានេះ តាមសំណូមពរអង្គការFAO អាទិភាពសំខាន់គឺថា ដាច់ខាត កុំខ្ជះខ្ជាយម្ហូបអាហារ រឺថាបើយើងលែងត្រូវការវា យើងអាចផ្តល់វាជួយជនក្រីក្រ។ រឺក៏យកអាហារដែលស្អុយរលួយទៅផលិតជាជីដើម្បីជួយអោយដីមាន ជីជាតិល្អ៕ដោយ ព្រំ សឿន សូលីណា (RFI)
