រៀបអាពាហ៍ពិពាហ៍ឲ្យកូនភ្លោះ ព្រោះតែជំនឿជាប្តីប្រពន្ធ ពីជាតិមុន
ភ្នំពេញ ៖ កាលពីព្រឹកថ្ងៃទី១២ កញ្ញានេះ អាពាហ៍ពិពាហ៍កូនភ្លោះបង្កើតមួយគូ ដែលបានប្រព្រឹត្តឡើង ក្នុងសង្កាត់ទន្លេបាសាក់ បានទាក់ទាញអារម្មណ៍ប្រជាពលរដ្ឋឱ្យមានការភ្ញាក់ផ្អើលយ៉ាង ខ្លាំង ព្រោះតែពិធីមង្គលការកូនភ្លោះនោះ បានរៀបចំតាមប្រពៃណីខ្មែរដូចមង្គលការគូស្វាមីភរិយាទូទៅដែរ ។
មិនតែប៉ុណ្ណោះ ភ្ញៀវប្រមាណជិត៣០តុបានចូលរួមពិសាភោជនីយអាហារក្នុងថ្ងៃ មង្គលការកូនភ្លោះមួយគូនោះតាមរយៈការអញ្ជើញតាមធៀបការដែលមានតម្លៃ គួរសមដែរ ។
ស្ត្រីមេម៉ាយឈ្មោះម៉ាន សុផានី ជាម្តាយកូនភ្លោះ បានរៀបរាប់ឱ្យដឹងថា កូនភ្លោះទាំងពីរនាក់នេះ មានអាយុ១២ឆ្នាំ ម្នាក់ជាកូនប្រុសឈ្មោះចាន់ ពោធិវង្ស និងម្នាក់ទៀតជាកូនស្រីឈ្មោះចាន់ អប្សរ ។
ស្ត្រីរូបនោះបានបញ្ជាក់ថា មូលហេតុដែលគាត់រៀបអាពាហ៍ពិពាហ៍ឱ្យកូនភ្លោះរបស់គាត់នោះ ព្រោះយល់ឃើញថា កូនភ្លោះទាំងពីរនោះ គឺជាតិមុនជាប្តីប្រពន្ធ ឬគូសង្សារដែលស្រឡាញ់គ្នាស្លាប់រស់ ហើយបានមកចាប់ជាតិក្នុងផ្ទៃតែមួយដូច្នេះ ៕ នាង/Cambodia News
