ប្រព័ន្ធសម្ពាធទាប មានឥទ្ធិពលកាន់តែខ្លាំង និងអូសបន្លាយដល់ថ្ងៃទី១៦ កញ្ញា
ភ្នំពេញ៖ នៅថ្ងៃ ទី១១ ខែកញ្ញា នេះ អ្នកនាំពាក្យ និងជានាយកខុទ្ទកាល័យ ក្រសួងធនធានទឹក និងឧតុនិយម លោក ចាន់ យុត្ថា បានឲ្យដឹងថា ប្រព័ន្ធសម្ពាធទាប ដែលក្រសួងបានជូនដំណឹង កាលពីថ្ងៃទី៣ ខែកញ្ញានោះ គឺនៅតែបន្តមានឥទ្ធិពលដល់ប្រទេសកម្ពុជា អាចអូសបន្លាយពេល រហូតដល់ថ្ងៃទី១៦ ខែកញ្ញា និងមានឥទ្ធិពលកាន់តែខ្លាំង ដោយសារព្រមពេលជាមួយគ្នានេះ មានសម្ពាធទាបសកម្មមួយផ្សេងទៀត បានកើតមានឡើង នៅក្នុងសមុទ្រចិនខាងត្បូង កៀកនឹងឆ្នេរសមុទ្រវៀតណាម។
លោក ចាន់ យុត្ថា ឲ្យដឹងទៀតថា ឥទ្ធិពលប្រព័ន្ធសម្ពាធទាប និងសម្ពាធទាបសកម្មខាងលើនេះនឹងបង្កឲ្យមានធ្លាក់ភ្លៀងកម្រិតពីមធ្យមទៅច្រើនអាចនាំឲ្យមានជំនន់ទឹកភ្លៀងដោយកន្លែង។ បរិមាណទឹកភ្លៀងដែលបានធ្លាក់ចាប់ពីថ្ងៃទី៦ ខែកញ្ញា រហូតមកដល់ថ្ងៃទី១០ ខែកញ្ញា មានកម្រិតចាប់ពី ៣៩ មីលីម៉ែត្រ រហូតដល់ ២០៧ មីលីម៉ែត្រ គឺបានធ្លាក់រាប៉ាយគ្រប់រាជធានី និងខេត្តទាំង ២៤។
បរិមាណ ទឹកភ្លៀងមានកម្រិតពីមធ្យមទៅច្រើន ក្នុងរយៈពេលបួនថ្ងៃកន្លងទៅនេះ ត្រូវបានមន្ត្រីអ្នកនាំពាក្យ លោក ចាន់ យុត្ថា បញ្ជាក់ទៀតថា មិនទាន់មានខេត្តណាមួយទទួលរងជំនន់ទឹកភ្លៀងនេះនោះឡើយទេ។ ផ្ទុយទៅវិញ គឺវាបានបញ្ចប់នូវការខ្វះទឹកសម្រាប់ការងារបង្កបង្កើនផល នៅតំបន់ខ្លះនៃខេត្តមួយចំនួនតូច។ ផ្នែកជំនាញ កំពុងបន្តធ្វើការតាមដានយ៉ាងយកចិត្តទុកដាក់ ចំពោះឥទ្ធិពលប្រព័ន្ធសម្ពាធទាប និងសម្ពាធទាបសកម្ម ដែលកំពុងបន្តមានឥទ្ធិពលដល់ព្រះរាជាណាចក្រកម្ពុជា៕ នាង/Cambodia News