ក្រុមតាលីបង់ស្វាគមសំណើចរចាសន្តិភាពរបស់រដ្ឋាភិបាលប៉ាគីស្ថាន
នៅថ្ងៃចន្ទម្សិលមិញនេះ គណបក្សនយោបាយសំខាន់ៗ នៅប៉ាគីស្ថានបានព្រមព្រៀងគ្នាសំរេចអោយមានដំណើរការចរចា ស្វែងរកសន្តិភាព ជាមួយក្រុមឧទ្ទាមតាលីបង់ ដើម្បីបញ្ចប់អំពើភេរវកម្មដែលបានសំលាប់មនុស្សរាប់ពាន់នាក់ ក្នុងប្រទេសតាំងពីឆ្នាំ២០០៧មក។ ក្រុមឧទ្ទាមអ៊ីស្លាមតាលីបង់បានសំដែងការស្វាគមន៍ដល់សំណើចរចារបស់ រដ្ឋាភិបាលប៉ាគីស្ថាន ហើយបានប្រាប់ថា ក្រុមខ្លួននឹងប្រជុំគ្នាពិភាក្សាពីសំណើនេះ នៅរវាងប៉ុន្មានថ្ងៃខាងមុខនេះហើយ។
នៅ ក្រុងអ៊ីស្លាម៉ាបាដ ថ្ងៃចន្ទម្សិលមិញ ក្នុងកិច្ចប្រជុំដែលមានវត្តមានដោយនាយករដ្ឋមន្ត្រីប៉ាគីស្ថាន ណាវ៉ា ស្ហារីហ្វ គណបក្សនយោបាយធំៗប៉ាគីស្ថាន បានសំរេចកិច្ចព្រមព្រៀងរួមគ្នាមួយ អោយរដ្ឋាភិបាលបើកការចរចាស្វែងរកសន្តិភាពជាមួយក្រុមឧទ្ទាមតាលីបង់។ នាយករដ្ឋមន្ត្រីប៉ាគីស្ថាន បានប្រាប់ថា ត្រៀមខ្លួនរួចជាស្រេចដើម្បីចរចា ជាមួយក្រុមឧទ្ទាម ក្នុងទិសដៅបិទបញ្ចប់អំពើហិង្សាក្នុងប្រទេស។
ស្ហាហ៊ី ឌុលឡា ស្ហាហ៊ីដ អ្នកនាំពាក្យចលនាតាលីបង់នៅប៉ាគីស្ថាន បានសំដែងការស្វាគមន៍ដល់សេចក្តីសំរេចរបស់រដ្ឋាភិបាល ហើយប្រាប់ថា នេះជាលើកទីមួយហើយដែលរដ្ឋាភិបាលហាក់បង្ហាញនូវភាពត្រឹមត្រូវហ្មត់ចត់ ក្នុងការចរចា ដូច្នេះ ក្នុងពីរថ្ងៃខាងមុខនេះ ក្រុមខ្លួននឹងពិភាក្សាគ្នាពីសំណើរបស់រដ្ឋាភិបាល ពីប្រក្រតិទិន និងអ្នកដែលត្រូវចូលរួមចរចា។
គួររំលឹកថា ១០ឆ្នាំកន្លងមកនេះ ក្រុមតាលីបង់និងទាហានប៉ាគីស្ថាន រឺក៏អាជ្ញាធរក្នុងស្រុកមួយចំនួន បានសំរេចកិច្ចព្រមព្រៀងសន្តិភាពជាច្រើនរួចមកហើយ តែកិច្ចព្រមព្រៀងទាំងនោះត្រូវបានអនុវត្តតែក្នុងភូមិសាស្ត្រដែល បានកំណត់ទុកប៉ុណ្ណោះ។ រដ្ឋាភិបាលទាមទារអោយកិច្ចព្រមព្រៀងគោរពតាមគោល ការណ៍រដ្ឋធម្មនុញ្ញ ផ្ទុយពីក្រុមឧទ្ទាមដែលទាមទារអោយមានការបង្កើតច្បាប់អ៊ីស្លាមដ៏តឹងតែង ហៅថា ស្ហារីយ៉ានោះ នៅក្នុងដែនដីខ្លួន។ កន្លងមក ក្រុមឧទ្ទាមបានបរិហាររិះគន់រដ្ឋាភិបាលដែលបានគាំទ្រនយោ បាយអាមេរិក។
ដោយឡែក គណបក្សនយោបាយប៉ាគីស្ថានបានសំដែងការប្រឆាំងនឹងយន្តហោះគ្មានមនុស្ស បើកខុសច្បាប់របស់អាមេរិក ដែលបានវាយប្រហារក្រុមអាល់កៃដា និងក្រុមតាលីបង់ នៅតំបន់ភាគពាយព្យប្រទេស តាមបណ្តោយព្រំដែនជាមួយអាហ្វហ្កានីស្ថាន។ ក្នុងករណីចាំបាច់ គណបក្សនយោបាយបានសុំ អោយរដ្ឋាភិបាលលើកយកបញ្ហានេះទៅប្រាប់អង្គការ សហប្រជាជាតិ៕ដោយ ព្រំ សឿន សូលីណា (RFI)
