ចិន និងអ៊ូសបេគីស្ថានចុះហត្ថលេខាបង្កើនការដោះដូរពាណិជ្ជកម្មរវាងគ្នា
នៅ ថ្ងៃចន្ទ ទី៩ កញ្ញា លោកប្រធានាធិបតីចិនស៊ី ជីនពីងបានចុះហត្ថលេខាលើកុងត្រាពាណិជ្ជកម្មជាមួយប្រទេស អ៊ូសបេគីស្ថានដែលមានទឹកប្រាក់សរុប ១៥ ០០០លានដុល្លារ។ កម្មវត្ថុរបស់ទីក្រុងប៉េកំាង គឺសំដៅពង្រឹងទំនាក់ទំនងសេដ្ឋកិច្ចជាមួយអតីតរដ្ឋសហភាពសូវៀតមួយនេះ នៅអាស៊ីកណ្តាល ពិសេសក្នុងវិស័យអាជីវកម្មប្រេងឥន្ធនៈ។
« អាទិភាព មួយក្នុងចំណោមអាទិភាពរបស់យើង គឺបង្កើនបរិមាណដោះដូរពាណិជ្ជកម្មរវាងប្រទេសទំាងពីរចិន អ៊ូសបេគីស្ថានពី ៣ ៤០០លានដុល្លារក្នុងឆ្នំា ២០១២ ឲ្យដល់ ៥ ០០០លានដុល្លារក្នុងមួយឆ្នំាៗចាប់ពីពេលនេះ ដល់ឆ្នំា ២០១៧ » នេះជាការថ្លែងរបស់លោកប្រធានាធិបតីចិនស៊ី ជីនពីងនៅក្នុងសន្និសីទ កាសែតមួយជាមួយលោកប្រធានាធិបតីអ៊ូសបេគីស្ថាន អ៊ីស្លាម ការីម៉ូវ។ យោងតាមលោកស៊ី ជីនពីងឲ្យដឹងថា តំាងពីឆ្នំា ២០០២ ចិនបានធ្វើវិនិយោគនៅក្នុងសេដ្ឋកិច្ចអ៊ូសបេគីស្ថានចំនួន ៦ ០០០លានដុល្លារ ដោយផ្តោតសំខាន់លើវិស័យប្រេងកាត ឧស្ម័ន អ៊ុយរ៉ាញ៉ូម ឬមួយក៏នៅក្នុងវិស័យកសិកម្មដែលសុទ្ធសឹងជាវិស័យអាទិភាពនៅក្នុង កិច្ចសហប្រតិបត្តិសេដ្ឋកិច្ចរវាងប្រទេសទំាងពីរ។
ជាការឆ្លើយតបវិញក្នុងនាមជាប្រទេសនំាឧស្ម័នចេញទៅប្រទេសចិន លោកប្រធានាធិបតីអ៊ូសបេគីស្ថានអ៊ីស្លាម ការីម៉ូវបានគូសបញ្ជាក់ថា ការពង្រឹងទំនាក់ទំនងសេដ្ឋកិច្ចរវាងចិន និងអ៊ូសបេគីស្ថានមិនត្រូវបានចិនគិតគូរ និងភ្ជាប់ទៅនឹងបញ្ហានយោបាយ ឬមួយក៏បញ្ហាអ្វីផ្សេងទេ។ ការថ្លែងយ៉ាងដូចនេះមកពីលោកប្រធានាធិបតីអ៊ូសបេគីស្ថានចង់និយាយ ផ្លៃផ្កាឲ្យក្រុមប្រទេសលោកខាងលិចមួយចំនួនដែលតែងតែទិតៀន រិះគន់លើបញ្ហាសិទ្ធិមនុស្សនៅអ៊ូសបេគីស្ថាន។
គួរជម្រាបជូនថា ក្នុងនាមជាប្រទេសដែលប្រើប្រាស់ថាមពលច្រើនជាងគេក្នុងលោក លោកស៊ី ជីនពីងកំពុងបំពេញទស្សនកិច្ចមួយជុំអាស៊ីកណ្តាលដើម្បីស្វែងថាមពល ថ្មីទៅចញ្ចឹមបំប៉នកំណើនសេដ្ឋកិច្ចរបស់ខ្លួន។ ទន្ទឹមគ្នានេះ គោលដៅរបស់លោកស៊ី ជីនពីងក៏ដើម្បីពង្រីកវត្តមានរបស់ចិននៅក្នុងតំបន់ដែលស្ថិតក្រោម ឥទ្ធិពលរបស់ប្រទេសរុស្ស៊ីផងដែរ។ មុនប្រទេសអ៊ូសបេគីស្ថាន លោកស៊ី ជីនពីងក៏បានចុះហត្ថលេខាលើកុងត្រាធ្វើអាជីវកម្មឧស្ម័នជាមួយ ប្រទេសតួកម៉េនីស្ថាន និងកាហ្សាក់ស្ថានកាលពីសប្តាហ៍កន្លងទៅដែរ៕ដោយ គួច គន្ធារ៉ា (RFI)