អាមេរិកគ្រោងវាយប្រហារទ្រង់ទ្រាយធំរយៈពេល៣ថ្ងៃលើស៊ីរី
នៅ ក្នុងពេលដែលលោកអូបាម៉ាកំពុង ស្វះស្វែងរកការគាំទ្រពីសំណាក់សមាជិកសភា និងពីប្រទេសដៃគូ ក្រសួងការពារជាតិអាមេរិកបានប្រុងប្រៀបគម្រោងការណ៍វាយប្រហារលើស៊ីរី ក្នុងទ្រង់ទ្រាយធំជាងការគ្រោងទុកកាលពីមុន។ នេះបើយោងតាមការចុះផ្សាយរបស់កាសែតអាមេរិក កាលពីថ្ងៃអង្គារ។ តាមផែនការថ្មីនេះ កងទ័ពអាមេរិកគ្រោងវាយប្រហារលើស៊ីរីក្នុងទ្រង់ទ្រាយធំ និងក្នុងរយៈពេល៣ថ្ងៃ។
យោងតាមការផ្សាយ របស់កាសែត The Los Angeles Times ដោយបានដកស្រង់សម្តីមន្រ្តីជាន់ខ្ពស់អាមេរិកចំនួន២រូប ដែលសុំមិនបញ្ចេញឈ្មោះ ក្រសួងការពារជាតិអាមេរិកបានពង្រីកគោលដៅដែលត្រូវវាយប្រហារក្នុង ប្រទេសស៊ីរី លើសពី ៥០កន្លែង ដែលគ្រោងទុកពីពេលមុន។
ម្យ៉ាងទៀត ក្នុងប្រតិបត្តិការយោធានេះ អាមេរិកគ្រោងនឹងប្រើយន្តហោះទម្លាក់គ្រាប់បែក បន្ថែមពីលើការបាញ់មីស៊ីលពីនាវាពិឃាតចំនួន ៤គ្រឿង នៅក្នុងសមុទ្រមេឌីទែរ៉ាណេ។ នាវាផ្ទុកយន្តហោះ អមដោយនាវាចម្បាំង ៣គ្រឿងផ្សេងទៀត ដែលកំពុងស្ថិតនៅក្នុងសមុទ្រក្រហម ក៏អាចនឹងចូលរួមក្នុងប្រតិបត្តិការយោធានៅស៊ីរីនេះដែរ។ មន្រ្តីយោធាអាមេរិកក៏បានបង្ហើបឲ្យដឹងផងដែរថា ប្រតិបត្តិការយោធានៅស៊ិរី នឹងធ្វើឡើងក្នុងទ្រង់ទ្រាយធំ ក៏ប៉ុន្តែ នឹងត្រូវធ្វើតែក្នុងរយៈពេល ៧២ម៉ោងតែប៉ុណ្ណោះ។
ក៏ប៉ុន្តែ រហូតមកទល់នឹងពេលនេះ លោកអូបាម៉ានៅតែមិនទាន់បានទទួលការអនុញ្ញាតជាផ្លូវការពីសភាអាមេរិក ដើម្បីបើកប្រតិបត្តិការយោធានៅស៊ីរីនៅឡើយទេ។ ម្យ៉ាងទៀត ការស្ទាបស្ទង់មតិជាច្រើនបង្ហាញថា ប្រជាជនអាមេរិកភាគច្រើនមិនចង់ឲ្យអាមេរិកធ្វើអន្តរាគមន៍យោធានៅ ស៊ីរីនេះទេ។
នៅថ្ងៃអង្គារសប្តាហ៍ក្រោយនេះ លោកអូបាម៉ានឹងថ្លែងសុន្ទរកថាមួយទៅកាន់ប្រជាជាតិអាមេរិក ដើម្បីពន្យល់ដោយផ្ទាល់ដល់ប្រជាជនអាមេរិក អំពីហេតុផល ដែលលោកចង់ធ្វើអន្តរាគមន៍យោធានៅស៊ីរី។ នៅក្នុងសប្តាហ៍ក្រោយនេះដែរ សភាអាមេរិកនឹងវិលត្រឡប់ពីវិស្សមកាលវិញ ហើយក៏នឹងលើកយកបញ្ហាស៊ីរីនេះមកជជែកដេញដោលគ្នាដែរ មុននឹងធ្វើការបោះឆ្នោតអនុម័តថា តើអនុញ្ញាតឲ្យលោកអូបាម៉ាបើកប្រតិបត្តិការយោធានៅស៊ីរីដែរឬអត់។
ក្នុងពេលដែលលោកអូបាម៉ាកំពុងបញ្ចុះបញ្ចូលសាធារណមតិជាតិ លោកចន ឃែរី ប្រមុខការទូតអាមេរិក វិញកំពុងតែដុតដៃដុតជើង ព្យាយាមស្វែងរកការគាំទ្រពីសំណាក់ប្រទេសជាដៃគូក្នុងឆាកអន្តរជាតិ ជាពិសេស បណ្តាប្រទេសនៅអឺរ៉ុប និងប្រទេសក្នុងសម្ព័ន្ធអារ៉ាប់៕ដោយ សេង ឌីណា (RFI)
