វីរុសបំប្លែងខ្លួននៅឥណ្ឌាឆ្លងដល់តំបន់ភាគខាងជើងប្រទេសវៀតណាម
សារព័ត៌មាន Cambodia News/
វៀតណាម (១១ ឧសភា ២០២១) ៖ អ្នកជំនាញផ្នែករោគរាតត្បាតវៀតណាម បានរកឃើញវីរុសបំប្លែងខ្លួនថ្មីរបស់ឥណ្ឌា បន្ទាប់ពីបានវិភាគសំណាកអ្នកជំងឺនៅទីក្រុងហាណូយនិងតំបន់ភាគខាងជើងមួយចំនួនទៀត។
ក្រសួងសុខាភិបាលបាននិយាយកាលពីល្ងាចថ្ងៃអាទិត្យថា សំណាកមួយត្រូវបានយកមកពីរដ្ឋធានីរបស់ប្រទេសវៀតណាម ខណៈសំណាកពីរទៀតមកពីខេត្ត Hung Yen និង ៥ នាក់ទៀតមកពីខេត្ត Thai Binh ។
លទ្ធផលនៃការធ្វើតេស្តបានបង្ហាញថាសំណាកទាំង ៨ មានផ្ទុកវីរុស B.1.617.2 ។ វីរុសបំប្លែងខ្លួននេះ ក៏ត្រូវបានគេរកឃើញផងដែរ នៅក្នុងសំណាកមួយចំនួនដែលប្រមូលបានពីអ្នកជំងឺនៅខេត្ត Hai Duong ភាគខាងជើងកាលពីថ្ងៃសុក្រ។
ក្រុមអ្នកជំនាញបានជឿជាក់ថា វីរុសបំប្លែងខ្លួន B.1.617.2 គឺងាយឆ្លងខ្លាំងណាស់ ហើយមានភាពធន់នឹងប្រសិទ្ធភាពរបស់វ៉ាក់សាំង ទោះមិនទាន់មានទិន្នន័យច្បាស់លាស់ក៏ដោយ៕
