យន្តហោះអង្គការអូតង់ សម្លាប់ជនស៊ីវិលអាហ្វហ្កនីស្ថានយ៉ាងហោច១០នាក់
កាលពីថ្ងៃសៅរ៍ចុងសប្តាហ៍កន្លងទៅ នៅភាគខាងកើតប្រទេសអាហ្វហ្កានីស្ថាន មានជនស៊ីវិលយ៉ាងហោច១០នាក់ បានស្លាប់បាត់បង់ជីវិតក្នុងការវាយប្រហារដោយយន្តហោះគ្មានមនុស្សបើក របស់អង្គការអូតង់។ យន្តហោះអង្គការអូតង់បានធ្វើការ កំចាត់ក្រុមបះបោរតាលីបង់ នៅខេត្តគូណា តាមបណ្តោយព្រំដែនជាប់ជាមួយប៉ាគីស្ថាន។
នៅខេត្តគូណា ភាគខាងកើតអាហ្វហ្កានីស្ថាន យន្តហោះគ្មានមនុស្សបើករបស់អង្គការអូតង់ ដែលយើងហៅថា យន្តហោះដ្រូននោះ បានវាយប្រហារប៉ះចំទៅលើរថយន្តមួយគ្រឿង សម្លាប់ជនស៊ីវិលយ៉ាងហោច១០នាក់ កាលពីថ្ងៃសៅរ៍កន្លងទៅ។ នេះបើយោងតាមអ្នកទទួលខុសត្រូវនានាក្នុងស្រុក ប្រាប់អោយដឹងនៅថ្ងៃអាទិត្យទី៨សីហានេះ។ ក្នុងចំណោមជនរងគ្រោះ មានស្ត្រី៤នាក់ កុមារ៤នាក់ និងអ្នកបើកបរ២នាក់។ ក្រុមឧទ្ទាមប្រដាប់អាវុធ៤នាក់ ក៏បានបាត់បង់ជីវិតក្នុងការវាយប្រហារនោះដែរ។ ពួកឧទ្ទាមទាំងនេះ ប្រហែលជាបានឡើងលើរថយន្តស៊ីវិលនោះ មុនពេលមានហេតុការណ៍។
លោក ស្ហ៊ូចូល មុល ចាឡាឡា ដែលជាអភិបាលខេត្តនេះ បានប្រាប់ថា មានជនស៊ីវិលស្លាប់យ៉ាងហោច ណាស់ក៏១២នាក់ដែរ។ ហើយក្រុមឧទ្ទាម៤នាក់ ដែលស្ថិតនៅក្នុងក្រុមអាល់កៃដា ត្រូវបានសម្លាប់។ ខេត្តគូណា នៅតាមព្រំដែនជាប់ជាមួយប៉ាគីស្ថាន ជាតំបន់ដែលសំបូរទៅដោយក្រុមបះបោរអ៊ីស្លាម។
ចំណែកកងកម្លាំងអន្តរជាតិនៃអង្គការអូតង់វិញ បានប្រាប់ថា បានប្រើយន្តហោះដ្រូនវាយប្រហារមែន តែការវាយប្រហារនោះបានសម្លាប់សត្រូវ១០នាក់។ ហើយអង្គការអូតង់ ក៏មិនបានទទួលព័ត៌មានអ្វីទាក់ទងថា មានជនស៊ីវិលស្លាប់នោះទេ។
ការទំលាក់គ្រាប់បែករបស់អង្គការអូតង់សម្លាប់ជនស៊ីវិល គឺជាមូលហេតុនៃកំហឹងរបស់ប្រធានាធិបតីអាហ្វហ្កានីស្ថាន។ កាលពីដើមខែកុម្ភៈកន្លងទៅ បន្ទាប់ពីមានស្ត្រីនិងកុមារ១០នាក់ បានស្លាប់បាត់បង់ជីវិត នៅក្នុងខេត្តគូណា ដដែលនេះ ប្រធានាធិបតី ហាមីឌ កាហ្សៃ បានហាមឃាត់កងទ័ពជាតិមិនអោយសុំជំនួយផ្នែកអាកាសពីអង្គការអូតង់ ដាច់ខាត។
នៅថ្ងៃអាទិត្យនេះដែរ នៅខេត្តវ៉ារដាក់ ភាគខាងត្បូងប្រទេស ក្រុមតាលីបង់បានវាយប្រហារការិយាល័យទីភ្នាក់ងារចារកិច្ច ធ្វើអោយភ្នាក់ងារចារកិច្ចយ៉ាងហោច៤នាក់ ស្លាប់ និងជនស៊ីវិលជាង១០នាក់នាក់ទៀតរងរបួស។ យោងតាមអភិបាលខេត្ត ហេតុការណ៍នេះ ក៏បានសម្លាប់ជនឧទ្ទាម៦នាក់ផងដែរ៕ដោយ ព្រំ សឿន សូលីណា (RFI)
