ព្រះមហាក្សត្រមិនទាន់ទទួលយកសំណើរបស់បក្សប្រឆាំង
ភ្នំពេញ៖ លោក សម រង្ស៊ី ប្រធានគណបក្សសង្គ្រោះជាតិ បានផ្ញើលិខិតមួយទៅទីក្រុងប៉េកាំង ប្រទេសចិន ថ្វាយព្រះមហាក្សត្រ កាលពីថ្ងៃច័ន្ទ ទី២ ខែកញ្ញា។ នេះជាលិខិតលើកដំបូងដែលគណបក្សប្រឆាំងបានផ្ញើទៅព្រះមហាក្សត្រ នៅគ្រាដែលស្ថានភាពនយោបាយនៅកម្ពុជា កំពុងឡើងកម្ដៅនយោបាយខ្លាំង ក្រោយការបោះឆ្នោត។
ព្រះមហាក្សត្រ សម្ដេចព្រះបរមនាថ នរោត្តម សីហមុនី មិនបានឆ្លើយតបចំពោះសំណើសុំរបស់គណបក្សប្រឆាំងដែល សុំយាងព្រះអង្គឲ្យធ្វើព្រះរាជអន្តរាគមន៍ និងជាអាជ្ញាកណ្ដាលដោះស្រាយរឿងភាពមិនប្រក្រតីក្នុងការបោះឆ្នោត នោះទេ។
ព្រះអង្គបានផ្ញើលិខិតមួយតបនឹងលិខិតស្នើសុំរបស់លោក សម រង្ស៊ី កាលពីថ្ងៃទី៣ ខែកញ្ញា ក្នុងន័យអរគុណដល់លោក សម រង្ស៊ី ដែលបានគោរព និងដង្ហែតាមព្រះរាជតម្រិះដែលមានចែងនៅក្នុងព្រះរាជសាររបស់ ព្រះអង្គ ចុះថ្ងៃទី៣០ ខែសីហា។ ប៉ុន្តែក្នុងលិខិតខ្លីរបស់ព្រះអង្គ មិនបានតបចំពោះសំណើសុំរបស់គណបក្សប្រឆាំងដែលចង់ឲ្យទ្រង់មកធ្វើ ព្រះរាជអន្តរាគមន៍រឿងភាពមិនប្រក្រតីនៃការបោះឆ្នោត៕ Cambodia News
