លោក សម រង្ស៊ី ស្វែងរកអន្តរាគមន៍ពីព្រះមហាក្សត្រ ក្នុងជម្លោះបោះឆ្នោត
ភ្នំពេញ៖ លោក សម រង្ស៊ី ប្រធានគណបក្សសង្រ្គោះជាតិ ដែលជាគណបក្សប្រឆាំងក្នុងប្រទេសកម្ពុជា កាលពីដើមសប្តាហ៍នេះ បានផ្ញើលិខិតមួយច្បាប់ទៅព្រះមហាក្សត្រ ដើម្បីស្វែងរកអន្តរាគមន៍ពីព្រះអង្គ ឲ្យជួយរកដំណោះស្រាយចំពោះភាពមិនប្រក្រតី នៃការបោះឆ្នោតកាលពីថ្ងៃទី២៨ កក្កដា កន្លងទៅនោះ។
លិខិតចុះថ្ងៃទី០២ ខែកញ្ញា ឆ្នាំ២០១៣ របស់លោក សម រង្ស៊ី ដែលទើបផ្សព្វផ្សាយនៅថ្ងៃនេះបានសរសេរថា ដោយឈរលើស្មារតីរដ្ឋធម្មនុញ្ញ មាត្រា៨ ដែលបានចែងថា «ព្រះមហាក្សត្រ ព្រះអង្គទ្រង់ជានិមិត្តរូប នៃឯកភាពជាតិ និងនិរន្តរភាពជាតិ, ព្រះមហាក្សត្រទ្រង់ជាអ្នកធានាឯករាជ្យជាតិ អធិបតេយ្យ និងបូរណភាពទឹកដី នៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ» និងមាត្រា៩ នៃរដ្ឋធម្មនុញ្ញ ដែលក៏បានចែងថា «ព្រះមហាក្សត្រទ្រង់មានតួនាទីខ្ពង់ខ្ពស់ ជាអាជ្ញាកណ្តាល ដើម្បីធានាការប្រព្រឹត្តទៅ នៃអំណាចសាធារណៈឲ្យមានភាពទៀងទាត់»។ «អាស្រ័យលើស្មារតីរដ្ឋធម្មនុញ្ញនេះ ទូលព្រះបង្គំ សូមព្រះអង្គទ្រង់ព្រះមេត្តាជួយធ្វើព្រះរាជអន្តរាគមន៍ ដើម្បីរកដំណោះស្រាយចំពោះភាពមិនប្រក្រតីក្នុងការបោះឆ្នោត ប្រកបដោយតម្លាភាព និងយុត្តិធម៌ ដែលជាការចង់បានរបស់ប្រជាពលរដ្ឋខ្មែរជាម្ចាស់ឆ្នោត»។
ការស្នើសុំអន្តរាគមន៍ពីព្រះមហាក្សត្ររបស់លោក សម រង្ស៊ី នេះ ធ្វើឡើងរយៈពេល៥ថ្ងៃប៉ុណ្ណោះ មុនមហាបាតុកម្មរបស់គណបក្សសង្រ្គោះជាតិដែលគ្រោងធ្វើឡើងនៅថ្ងៃទី៧ កញ្ញា ដោយវិធីស្មិងស្មាធិ៍ ក្នុងការទាមទារឲ្យមានការបង្កើនគណៈកម្មការពិសេសឯករាជ្យ ធ្វើការស៊ើបអង្កេត និងដោះស្រាយភាពមិនប្រក្រតីពាក់ព័ន្ធនឹងការបោះឆ្នោតជ្រើសតាំង តំណាងរាស្រ្តនីតិកាលទី៥នោះ៕ Cambodia News