អង្គការពលកម្មអន្តរជាតិរកឃើញថាកម្មករនេសាទនៅថៃធ្វើការដោយបង្ខំ
កម្មករ នេសាទនៅប្រទេសថៃបានរងការបង្ខំឲ្យធ្វើការងារយូរម៉ោងក្នុង ស្ថានភាពប្រកបដោយគ្រោះថ្នាក់ ព្រមទាំងទទួលបានប្រាក់ឈ្នួលទាបទៀតផង។
នេះបើតាមរបាយការណ៍ថ្មី មួយដែលរៀបចំឡើងដោយអង្គការពលកម្មអន្តរជាតិ ដែលបានធ្វើការសម្ភាសជាមួយកម្មករអន្តោប្រវេសន៍ជាច្រើនរយនាក់ នៅក្នុងឧស្សាហកម្មម្ហូបសមុទ្រនៅប្រទេសថៃ។
របាយការណ៍ នេះបានរកឃើញថា ការបង្ខំឲ្យកម្មករធ្វើការក្លាយជារឿងធម្មតាទូទៅ ហើយកម្មករភាគច្រើនមកពីប្រទេសមីយ៉ាន់ម៉ា និងប្រទេសកម្ពុជា មិនទទួលបានការការពារគ្រប់គ្រាន់នោះទេ។
លោក Max Tunon មកពីអង្គការពលកម្មអន្តរជាតិ ហើយបានបំពេញការងារជាមួយរដ្ឋាភិបាលថៃអស់រយៈពេលពីរឆ្នាំកន្លងមក បានព្យាយាមលើកកម្ពស់ស្ថានភាពការងារនេះ ហើយលោកក៏ចង់ឃើញមានច្បាប់បន្ថែមទៀតនៅក្នុងឧស្សាហកម្មមួយនេះ ដូចជាចង់ឃើញឲ្យកម្មករអន្តោប្រវេសន៍បម្រើការងារតាមទូកនេសាទ មានការចុះឈ្មោះត្រឹមត្រូវ និងម្ចាស់កប៉ាល់នេសាទត្រូវរក្សានូវចំនួនសមាជិកឲ្យបានត្រឹមត្រូវ ជាដើម៕ (Radio Australia)
