គណបក្សនយោបាយបារាំងយល់ខុសគ្នា ករណីមានអន្តរាគមន៍យោធានៅស៊ីរី
នៅដើមសប្តាហ៍នេះ គណបក្សនយោបាយបារាំងនានា បានសំដែងការយល់ឃើញខុសៗគ្នា ចំពោះលទ្ធភាពដែលបណ្តាបស្ចិមប្រទេសអាចធ្វើអន្តរាគមន៍យោធានៅប្រទេស ស៊ីរី។ គណបក្សខ្លះគិតថា ប្រសិនបើបស្ចិមប្រទេសធ្វើអន្តរាគមន៍យោធានេះមែន នោះនឹងបង្កអោយមានអស្ថិរ ភាពក្នុងតំបន់។ គណបក្សខ្លះទៀតបានសុំរដ្ឋាភិបាលបារាំងអោយផ្តល់អាទិភាពលើជំរើសនយោបាយ មុនគេ។
តើបារាំងនឹងធ្វើ អន្តរាគមន៍យោធា នៅស៊ីរីដែររឺក៏យ៉ាងណា? នៅថ្ងៃចន្ទដើមសប្តាហ៍នេះ ប្រមុខការទូតបារាំង លោក Larent Fabius បានប្រាប់ថា គ្រប់ជំរើសនយោបាយកំពុងតែស្ថិតនៅលើតុការងាររបស់រដ្ឋាភិបាលបារាំង។ ហើយក្នុងពេលឆាប់ៗខាងមុខនេះ រដ្ឋាភិបាលបារាំងនឹងជ្រើសយកជំរើសតែមួយគត់ មកអនុវត្ត។
គណបក្ស នយោបាយបារាំងនានា បានបែងចែកជាបក្សពួក ព្រោះខ្លួនយល់ឃើញខុសៗគ្នា ករណីមានអន្តរាគមន៍យោធានៅស៊ីរី។ លោក Florian Philippot អនុប្រធានគណបក្សរណសិរ្សជាតិបារាំង ហៅកាត់ថា FN ដែលជាគណបក្សប្រឆាំងស្តាំនិយមជ្រុលនោះ បានលើកឡើងថា ការធ្វើការទូតតាមរយៈអន្តរាគមន៍យោធានៅស៊ីរី គឺជាការឃ្លាតចាកពីច្បាប់អន្តរជាតិ ឃ្លាតចាកពីបទបញ្ជាអង្គការសហប្រជាជាតិ។ គឺដូចជាអ្នកជិះសេះទៅសំលាប់ខ្លួនអញ្ចឹង។ គណបក្សនេះបន្ថែមថា ថ្វីដ្បិតតែមានរូបភាពបង្ហាញថា មានការទំលាក់គ្រាប់បែកសម្លាប់មនុស្សនៅស៊ីរី ក្នុងពេលកន្លងទៅក្តី ការធ្វើអន្តរាគមន៍យោធានេះ គឺជាការសំរេចចិត្តដោយពឹងផ្អែកទៅលើរូបភាពតែប៉ុណ្ណោះ។ យោងតាមគណបក្ស FN អន្តរាគមន៍យោធានៅស៊ីរី ជាការជួយដល់ក្រុមឧទ្ទាម ដែលដឹកមុខដោយក្រុមអ៊ីស្លាមជ្រុលនិយម ធ្លាប់បានសម្លាប់ជនស្លូតត្រង់ច្រើននាក់។
លោក Jean Luc Mélenchon មកពីគណបក្សឆ្វេងនិយមជ្រុលមួយ បានលើកឡើងថា អន្តរាគមន៍យោធានេះ គឺជាកំហុសមួយធ្ងន់ធ្ងរ ព្រោះគេដឹងហើយថា អាមេរិកខាងជើងមានទំលាប់យកលេសផ្សេងៗ ធ្វើជាហេតុផលនៃអន្តរាគមន៍យោធារបស់ខ្លួន។
រីឯគណបក្សកុំម្មុយនិស្តបារាំងវិញ បានសុំអោយរដ្ឋាភិបាលបារាំងជ្រើសយកជំរើសនយោបាយមួយ ចៀសអោយផុតពីអន្តរាគមន៍យោធា។
នៅឯគណបក្សសហភាពដើម្បីចលនាប្រជាប្រិយបារាំង ហៅកាត់ថា UMP ដែលជាបក្សប្រឆាំងស្តាំនិយម ធ្លាប់កាន់អំណាចក្រោមអណត្តិប្រធានាធិបតី សារកូស៊ី នោះ សមាជិកនានាមានការខ្វែងគំនិតគ្នា។ មានទាំងអ្នកជំទាស់ មានទាំងអ្នកគាំទ្រអន្តរាគមន៍យោធានៅស៊ីរី បែបយ៉ាងលោក អាឡាំង ហ្ស៊ុបប៉េ អតីតប្រមុខការទូតបារាំងមួយរូប ដែលធ្លាប់បានសុំអោយមានជំនួយយោធាជួយក្រុមប្រឆាំងស៊ីរី។
ដោយឡែក គណបក្សការពារបរិដ្ឋានបារាំង បានសុំអោយរដ្ឋាភិបាលបារាំងនិងសហភាពអឺរ៉ុប រកដំណោះ ស្រាយជាបន្ទាន់ ជួយការពារសុវត្ថិភាពជនស៊ីវិល អោយរួចផុតពីការទំលាក់គ្រាប់បែក និងពីកាណុងកាំភ្លើងរបស់កងទ័ពស៊ីរី៕ដោយ ព្រំ សឿន សូលីណា (RFI)
