យុវជនជនជាតិបារាំង២នាក់បានបាត់ខ្លួននៅលើភ្នំហិមាល័យ
ក្រុមប៉ូលិសបានបន្តស្វែងរកយុវជនជន ជាតិបារាំង២នាក់ ដែលបានបាត់ខ្លួននៅតំបន់លើភ្នំហិមាល័យ រហូតដល់ថ្ងៃចន្ទម្សិលមិញ បន្ទាប់ពីបុរសជនជាតិបារាំង២នាក់នេះបានបាត់ខ្លួនតាំងពីថ្ងៃ ព្រហស្បតិ៍សប្តាហ៍មុន។ ប៉ូលិសឥណ្ឌាមានគម្រោងបើកប្រតិបត្តិការស្វែងរកតាមឧទ្ធម្ភាគចក្រ ទៀត។
រហូតដល់ថ្ងៃចន្ទម្សិលមិញ ប៉ូលិសនៃប្រទេសឥណ្ឌាដែលគ្រប់គ្រងនៅតំបន់ភ្នំហិមាល័យ បានបន្តប្រតិបត្តិការស្វែងរកយុវជនជនជាតិបារាំង២នាក់ ដែលបានបាត់ខ្លួន តាំងពីថ្ងៃព្រហស្បតិ៍សប្តាហ៍មុន។ យុវជនជនជាតិបារាំងទាំងពីរ ម្នាក់អាយុ២០ឆ្នាំ និងម្នាក់ទៀតអាយុ២១ឆ្នាំ បានស្ថិតនៅក្នុងក្រុមទេសចរអ្នកដើរភ្នំ ចំនួន៣២នាក់។ ពួកគេបានដើរកំសាន្តក្នុងចន្លោះជួរភ្នំហិមាល័យ ក្នុងតំបន់ Dharamshala។
ប៉ូលីសបាននិយាយថា យុវជនទាំងពីរនាក់ចាប់ផ្តើមបាត់ខ្លួននៅថ្ងៃព្រហស្បតិ៍សប្តាហ៍មុន បន្ទាប់ពីពួកគេបានសម្រេចចិត្តដើរផ្សងព្រេងក្នុងព្រៃ នៃចន្លោះភ្នំ ដើម្បីទៅរកតំបន់កំពូលភ្នំដែលខ្ពស់ជាងគេ។ ចំណែកឯសមាជិកក្នុងក្រុមផ្សេងទៀត បានត្រឡប់មកជំរំរបស់ពួកគេ វិញ។ នៅពេលនេះ ប៉ូលិសបាននិយាយថា ពួកគេកំពុងពិចារណាអំពីការផ្តើមប្រតិបត្តិការស្វែងរកតាម ឧទ្ធម្ភាគចក្រវិញម្តង។
គួរបញ្ជាក់អោយដឹងថា នៅក្នុងតំបន់ Dharamshala ដែលយុវជនជនជាតិបារាំងទាំងពីរបានបាត់ខ្លួននោះ ត្រូវបានស្គាល់ថា ជាតំបន់ដែលមានការផ្លាស់ប្តូរអាកាសធាតុលឿន និងមានភ្លៀងធ្លាក់ខ្លាំងនៅក្នុងរដូវវស្សានេះ។ កាលពីឆ្នាំមុន អ្នកកាសែតជនជាតិឥណ្ឌាម្នាក់ក៏បានស្លាប់នៅក្នុងតំបន់នេះដែរ។
យោងតាមការបញ្ជាក់របស់ប៉ូលិស ការស្វែងរកជនជាតិបារាំងក្នុងរយៈពេលប៉ុន្មានថ្ងៃមកនេះ ត្រូវបានធ្វើរហូតដល់កំពស់៤៥០០ម៉ែត្រ ប៉ុន្តែ គ្មានសញ្ញានៃទំនាក់ទំនងណាមួយត្រូវបានគេមើលឃើញឡើយ៕ដោយ លាង ដឺលុច (RFI)
