ក្បួនរថយន្តមន្រ្តីត្រួតពិនិត្យអាវុធគីមីរបស់ អ.ស.ប រងការលបវាយប្រហារក្នុងប្រទេសស៊ីរី
អង្គការសហប្រជាជាតិបានបង្ហាញ ការខឹង សម្បារបស់ខ្លួន បន្ទាប់ពីក្បួនរថយន្តរបស់មន្រ្តីត្រួតពិនិត្យអាវុធគីមីរបស់ អង្គការសហប្រជាជាតិបានរងការលបបាញ់ប្រហារក្នុងប្រទេសស៊ីរី។
ក្រុម ការងារអង្គការសហប្រជាជាតិ បានចាកចេញពីទីក្រុងដាម៉ាស់ ដែលកាន់កាប់ដោយរដ្ឋាភិបាលស៊ីរី នៅពេលដែលមានការបាញ់កាំភ្លើងជាច្រើនគ្រាប់ទៅលើក្បួនរថយន្ត របស់ខ្លួន។
ក្រុមការងារនេះ បានទៅតំបន់កើតហេតុបន្ទាប់ពីទទួលបានការអនុញ្ញាតពីរដ្ឋាភិបាល ស៊ីរី ដើម្បីស៊ើបអង្កេតករណីប្រើអាវុធគីមី ដែលបានធ្វើឲ្យមនុស្សរាប់រយនាក់ស្លាប់កាលពីសប្តាហ៍មុន។
លោក Martin Nesirky អ្នកនាំពាក្យអគ្គលេខាធិការអង្គការសហប្រជាជាតិ មានប្រសាសន៍ថា រដ្ឋាភិបាលស៊ីរី និងបក្សប្រឆាំងបានសន្យាថា នឹងផ្អាកការបាញ់គ្នាក្នុងតំបន់នោះ ក្នុងអំឡុងពេលនៃការត្រួតពិនិត្យ និងស៊ើបអង្កេតពីអង្គការសហប្រជាជាតិ។
មកទល់ពេលនេះ ក្រុមមន្រ្តីអធិការកិច្ចអាវុធគីមីរបស់អង្គការសហប្រជាជាតិ បានទៅដល់កន្លែងដែលរងការចោទប្រកាន់ថា មានការប្រើប្រាស់អាវុធគីមីនោះហើយ៕ (Radio Australia)
