សវនាការកាត់ទោសប៉ូ ស៊ីឡៃ បិទបញ្ចប់នៅថ្ងៃចន្ទនេះ
នៅថ្ងៃ ចន្ទនេះ តុលាការក្រុង Jinan ខេត្ត Shandong ភាគខាងលិចប្រទេសចិន បានបិទបញ្ចប់សវនាការកាត់ទោស លោកប៉ូ ស៊ីឡៃ អតីតមន្ត្រីជាន់ខ្ពស់គណបក្សកុំម្មុយនិស្តចិន។ លោក ប៉ូ ជាប់ចោទពីបទស៊ីសំណូក និងបំពានអំណាចដើម្បីទប់ស្កាត់ការស៊ើបអង្កេតលើការធ្វើឃាតពាណិជ្ជករ អង់គ្លេសមួយរូប ដែលមានពាក់ព័ន្ធនឹងភរិយាលោក។ ក្នុងការកាត់ទោស៥ថ្ងៃកន្លងមកនេះ លោក ប៉ូ តែងតែបដិសេធការចោទប្រកាន់ទាំងនេះជានិច្ច។ ប៉ូ ស៊ីឡៃ ប្រហែលជាអាចទទួលទោសប្រហារជីវិត រឺក៏ជាប់ពន្ធនាគារមួយជីវិត។ តុលាការនឹងចេញសេចក្តីវិនិច្ឆ័យទោសនៅពេលក្រោយ។
គេពុំទាន់ដឹងថា តើពេលណាទើបតុលាការចិនចេញសេចក្តីវិនិច្ឆ័យលើទោសដែលលោក ប៉ូ ស៊ីឡៃ ត្រូវទទួលនោះទេ។ តុលាការចិនបានបញ្ចប់សវនាការកាត់ទោសលោក ប៉ូ នៅថ្ងៃចន្ទនេះហើយ។ អតីត មន្ត្រីជាន់ខ្ពស់គណបក្សកុំម្មុយនិស្តចិន ជាប់ចោទពីបទស៊ីសំណូកប្រាក់២លាន៦សែន៧ម៉ឺនអឺរ៉ូ ពីពាណិជ្ជករចិនរូប និងពីបទបំពានអំណាចដើម្បីទប់ស្កាត់ការស៊ើបអង្កេតលើការធ្វើឃាត ពាណិជ្ជករអង់គ្លេសមួយរូប ដែលមានជាប់ពាក់ព័ន្ធនឹងភរិយាលោក។
ក្នុងការកាត់ទោស៥ថ្ងៃមកនេះ លោក ប៉ូ តែងតែបដិសេធការចោទប្រកាន់ទាំងនេះជានិច្ច។ កាលពីថ្ងៃសៅរ៍ ប៉ូ ស៊ីឡៃ បានប្រាប់ថា លោកទទួលខុសត្រូវមួយចំណែក ក្នុងទង្វើបន្លំថវិការដ្ឋចិនប្រមាណ ៦១ម៉ឺន២ពាន់អឺរ៉ូ ដែលបានផ្ទេរទៅក្នុងគណនីធនាគាររបស់ភរិយាលោក គឺលោកស្រី ហ្គូ កៃឡៃ។
លោក Wang Lijun អតីតមេដឹកនាំប៉ូលិសក្រុង Chongqing ជាក្រុងធ្លាប់ស្ថិតក្រោមការដឹកនាំរបស់លោកប៉ូ បានឡើងមកធ្វើសាក្សី ទាក់ទងនឹងការចោទលោកប៉ូ ថាបានទប់ស្កាត់ការស៊ើបអង្កេតលើការធ្វើឃាតពាណិជ្ជករអង់គ្លេសមួយរូប ដែលភរិយាលោកប៉ូមានការពាក់ព័ន្ធ។ លោក Wang ប្រាប់ថា បន្ទាប់ពីលោកបានរ៉ាយរ៉ាប់ពីការពាក់ព័ន្ធរបស់លោកស្រី ហ្គូ កៃឡៃ ក្នុងការដាក់ថ្នាំបំពុលសម្លាប់ពាណិជ្ជករអង់គ្លេស Neil Heywood កាលពីឆ្នាំ២០១១ មក លោកប៉ូ បានដកហូតរូបលោកចេញពីតំណែងមេដឹកនាំប៉ូលិសក្រុង Chongqing។ ប៉ូ ស៊ីឡៃ បានប្រកែកឆ្លើយតបវិញថា អតីតមេដឹកនាំប៉ូលិសមួយរូបនេះ ភូតភរទាំងស្រុង។
នៅថ្ងៃចន្ទនេះ ទាក់ទងនឹងពាក្យចចាមអារ៉ាមថា ខ្លួនមានជីវភាពហ៊ឺហា ចាយវាយហួសប្រមាណនោះ អតីតមន្ត្រីគណបក្សកុំម្មុយនិស្ត ប៉ូ ស៊ីឡៃ បានប្រាប់ថា ខោខ្លីដែលលោកស្លៀកប្រើរាល់ថ្ងៃនេះ គឺជាខោដែលម្តាយលោកប្រគល់អោយលោក តាំងតែពីទស្សវត្សរឆ្នាំ១៩៦០ម្ល៉េះ។ លោក ប៉ូ បន្ថែមថា លោកមិនបានប្រើសំលៀកបំពាក់យីហោថ្លៃៗអ្វីនោះទេ៕ដោយ ព្រំ សឿន សូលីណា (RFI)
