ក្រុមប្រឹក្សាធម្មនុញ្ញប្រកាសទទួលពាក្យបណ្តឹង ចំពោះការមិនពេញចិត្តសេចក្តីសម្រេចរបស់ គ.ជ.ប
ភ្នំពេញ៖ កាលពីថ្ងៃទី២០ ខែសីហា ក្រុមប្រឹក្សាធម្មនុញ្ញ ដែលជាអង្គកាត់សេចក្តីចុងក្រោយទាក់ទងនឹងការបោះឆ្នោតបានប្រកាស ថា ចាប់ពីថ្ងៃទី២០ ដល់ថ្ងៃទី២២ ខែសីហា ឆ្នាំ២០១៣ អគ្គលេខាធិការដ្ឋានក្រុមប្រឹក្សាធម្មនុញ្ញត្រៀមទទួលពាក្យបណ្តឹង ២៤ម៉ោង លើ២៤ម៉ោង ចំពោះគណបក្សនយោបាយដែលមិនសុខចិត្តនឹងសេចក្តីសម្រេចរបស់ គណៈកម្មាធិការជាតិរៀបចំការបោះឆ្នោត ក្នុងដំណាក់កាល នៃការប្រកាសលទ្ធផលបណ្តោះអាសន្ន នៃការបោះឆ្នោតជ្រើសតាំងតំណាងរាស្រ្តអាណត្តិទី៥។
សូមរំលឹកថា លទ្ធផលបណ្តោះអាសន្ននៃការបោះឆ្នោតជ្រើសតាំងតំណាងរាស្រ្តអាណត្តិ ទី៥ ត្រូវបាន គ.ជ.ប ធ្វើការប្រកាសកាលពីថ្ងៃទី១២ ខែសីហា កន្លងទៅ ដោយបានបង្ហាញថា គណបក្សប្រជាជនកម្ពុជាដែលកំពុងគ្រប់គ្រងប្រទេសបច្ចុប្បន្ន ទទួលបានសំឡេងគាំទ្រភាគច្រើន។ ចំពោះការប្រកាសនេះ គណបក្សសង្រ្គោះជាតិ ដែលជាគណបក្សជំទាស់បានប្តឹងចំពោះលទ្ធផលបណ្តោះអាសន្ននេះទៅ គ.ជ.ប ដោយបានដាក់ពាក្យបណ្តឹងចំនួន១៧នៅតាមមណ្ឌលរាជធានី ខេត្តនីមួយៗ។
យោងតាមការប្រកាសរបស់ គ.ជ.ប គិតមកត្រឹមល្ងាចថ្ងៃទី១៦ ខែសីហា ឆ្នាំ២០១៣ បណ្តឹងចំនួន១៧ដែលប្តឹងដោយគណបក្សជំទាស់ ត្រូវបាន គ.ជ.ប ដោះស្រាយរួចរាល់ហើយ ប៉ុន្តែ គ.ជ.ប បានបើកសិទ្ធិឲ្យប្តឹងតវ៉ាទៅក្រុមប្រឹក្សាធម្មនុញ្ញក្នុងរយៈ ពេល៧២ម៉ោង ក្នុងករណីមិនសុខចិត្ត។ ស្របគ្នានេះ បើតាមការប្រកាសរបស់ក្រុមប្រឹក្សាធម្មនុញ្ញ យ៉ាងហោចណាស់ពាក្យបណ្តឹងចំនួន១៥ដែលប្តឹងបដិសេធនឹងសេចក្តីសម្រេច របស់ គ.ជ.ប លើលទ្ធផលបណ្តោះអាសន្ន នៃការបោះឆ្នោត ត្រូវបានប្តឹងដោយគណបក្សសង្រ្គោះជាតិ។ ហើយកាលពីថ្ងៃទី២០ សីហា ម្សិលមិញនេះ ពាក្យបណ្តឹងចំនួន៨ ត្រូវក្រុមប្រឹក្សាធម្មនុញ្ញទាត់ចោល។
ផ្អែកតាមប្រតិទិននៃការបោះឆ្នោតជ្រើសតាំងតំណាងរាស្រ្តនីតិកាល ទី៥ គ.ជ.ប នឹងប្រកាសផ្សាយលទ្ធផលផ្លូវការ នៃការបោះឆ្នោត ការបែងចែកអាសនៈ និងការកំណត់បេក្ខជនជាប់ឆ្នោត បន្ទាប់ពីក្រុមប្រឹក្សាធម្មនុញ្ញដោះស្រាយបណ្តឹងចប់ជាស្ថាពរ៕ Cambodia News