ព្យុងយ៉ាងយល់ព្រមឲ្យរៀបចំជំនួបរវាងក្រុមគ្រួសារដែលបែកគ្នាក្រោយសង្រ្គាមកូរ៉េ
នៅ ថ្ងៃអាទិត្យ ទី១៨ សីហា កូរ៉េខាងជើងបានយល់ព្រមតាមសំណើរបស់កូរ៉េខាងត្បូងដែលសុំឲ្យរៀបចំ ជំនួបរវាងក្រុមគ្រួសារកូរ៉េដែលបានបែកគ្នាតំាងពីសង្រ្គាមកូរ៉េ កាលពី ៦០ឆ្នំាមុន នេះបើតាមការបញ្ជាក់របស់ទីភ្នាក់ងារផ្លូវការកូរ៉េខាងជើងឈ្មោះ KCNA។
ការរៀបចំឲ្យមានការជួបជុំគ្នារវាងក្រុមគ្រួសារកូរ៉េខាងជើង និងខាងត្បូងដែលបានបែកខ្ញែកគ្នាកាលពី ៦០ឆ្នំាមុនគ្រោងនឹងធ្វើនៅក្នុងពិធីប្រារព្ធបុណ្យប្រពៃណីដែលឆ្នំា នេះចំថ្ងៃទី១៩ កញ្ញា។ រីឯទីកន្លែងជំនួបត្រូវបានក្រុងព្យុងយ៉ាងស្នើឲ្យរៀបចំនៅ Mont Kumgang ក្នុងទឹកដីកូរ៉េខាងជើង។ ទន្ទឹមគ្នានេះ កូរ៉េខាងជើងក៏បានស្នើឲ្យមានជំនួបមួយទៀតតាមវីដេអូនៅថ្ងៃទី ៤ តុលា ចំថ្ងៃខួបជំនួបកំពូលរវាងបងប្អូនគូសត្រូវទំាងពីរឆ្នំា ២០០៧។
សូមជម្រាបជូនថា តំាងពី ៦០ឆ្នំាមកហើយ ពោលតំាងពីការបិទបញ្ចប់សង្រ្គាមកូរ៉េក្នុងឆ្នំា ១៩៥៣ មក មានក្រុមគ្រួសារកូរ៉េរាប់សិបលាននាក់បានបែកបាក់គ្នា។ អ្នកខ្លះកំពុងរស់នៅប៉ែកខាងត្បូង អ្នកខ្លះទៀតកំពុងរស់នៅប៉ែកខាងជើង រីឯដែនដីទៀតសោត ក៏ត្រូវខ័ណ្ឌចែកជាពីរដែលមិនអាចឆ្លងទៅ ឆ្លងមកបានទេ។ កាលពីឆ្នំា ២០១០ ក៏ធ្លាប់បានរៀបចំឲ្យមានការជួបជុំរវាងក្រុមគ្រួសារកូរ៉េរបៀបនេះ ម្តងហើយ ក្រោមការជួយឧបត្ថម្ភពីកាកបាទក្រហម។
បច្ចុប្បន្ននេះ មានប្រជាជនកូរ៉េខាងត្បូងប្រមាណជា ៧២ ០០០នាក់ ក្នុងនោះមានជាងពាក់កណ្តាលមានអាយុលើសពី ៨០ឆ្នំាកំពុងរង់ចំាជួបក្រុមគ្រួសាររបស់ពួកគេយ៉ាងអន្ទះសារ។ តែក្នុងចំណោមអ្នកទំាងនោះ មានតែមួយភាគតូចប៉ុណ្ណោះដែលនឹងត្រូវអនុញ្ញាតឲ្យចូលរួមនៅក្នុង ពិធីជួបជុំនោះ។ ជាទូទៅ គឺពួកខាងត្បូងត្រូវធ្វើដំណើរទៅជួបគ្រួសារនៅខាងជើង។ សម្រាប់អ្នកដែលមានវ័យចំណាស់មិនអាចធ្វើដំណើរបាន នឹងត្រូវគេរៀបចំឲ្យមានជំនួបតាមវីដេអូ។ តាមពិតទៅ គឺរបបក្រុងសេអ៊ូលទេដែលបានស្នើក្រុងព្យុងយ៉ាងឲ្យមានការរៀបចំ ជំនួបរវាងក្រុមគ្រួសារកូរ៉េបែកបាក់គ្នាឡើងវិញ។
គួររម្លឹកជូនថា ក្រោយពីមានភាពតានតឹងរវាងគ្នាជាថ្មីក្នុងប៉ុន្មានខែចុងក្រោយ នេះមក អ្នកជិតខាងទំាងពីរដែលជាបងប្អូនបង្កើតគូសត្រូវបានព្យាយាមជួបចរចា គ្នាជាថ្មី។ ថ្មីៗនេះ កូរ៉េទំាងពីរបានព្រមព្រៀងគ្នាបើកឲ្យដំណើរការឡើងវិញនូវតំបន់ ឧស្សាហកម្ម Kaesong ដែលក្រុងព្យុងយ៉ាងបានបិទទ្វារកាលពីខែមេសាកន្លងទៅ៕ដោយ គួច គន្ធារ៉ា (RFI)