ជនភៀសខ្លួនស៊ីរីចូលទៅអ៊ីរ៉ាក់មានការកើនឡើង
អង្គការសហប្រជាជាតិឲ្យដឹងថា ការកើនឡើងនៃជនភៀសខ្លួនចេញពីប្រទេសស៊ីរីឆ្លងចូលទៅប្រទេស អ៊ីរ៉ាក់នៅពេលប៉ុន្មានថ្ងៃនេះ គឺក្នុងចំនួនខ្ពស់មិនធ្លាប់មាន។
តួលេខ នៃការកើនឡើងនេះ គឺចេញនៅចំពេលដែលអ្នកពិនិត្យសង្កេតការណ៍អន្ដរជាតិអំពីអាវុធគីមី បានទៅដល់ក្រុង Damascus នៅស៊ីរីដើម្បីចាប់ផ្ដើមការស៊ើបអង្កេតរបស់ខ្លួន។
រូបភាពជា ច្រើនបង្ហាញឲ្យឃើញថា ពលរដ្ឋស៊ីរីប្រុសស្រីរួមទាំងកុមារផងបានដើរឆ្លងព្រំដែនពីស៊ីរី ចូលទៅអ៊ីរ៉ាក់។ ទីភ្នាក់ងារជនភៀសខ្លួនអង្គការសហប្រជាជាតិនិយាយថា មានពលរដ្ឋស៊ីរីដល់ទៅ២ម៉ឺននាក់បានធ្វើដំណើរទៅដល់អ៊ីរ៉ាក់តាំង ពីថ្ងៃព្រហស្បតិ៍សប្ដាហ៍មុន ហើយពាក់កណ្ដាលនៃពួកគេគឺចូលមកនៅថ្ងៃសៅរ៍តែមួយថ្ងៃ។
គេ មិនទាន់ដឹងមូលហេតុដែលនាំឲ្យមានការរត់ចេញយ៉ាងច្រើននេះនៅឡើយទេ ប៉ុន្ដែបណ្ដាទីភ្នាក់ងារផ្ដល់ជំនួយ និងអាជ្ញាធរក្នុងតំបន់កំពុងតែមានការលំបាកក្នុងការទទួលយកមនុស្ស យ៉ាងច្រើនបែបនេះ។
នៅគ្រានេះដែរ នៅក្រុង Damascus ក្រុមអ្នកត្រួតពិនិត្យមួយក្រុមរបស់អង្គការសហប្រជាជាតិបានទៅដល់ ទីនោះ ដើម្បីចាប់ផ្ដើមការស៊ើបអង្កេតរយៈពេល២សប្ដាហ៍ជុំវិញការអះអាងថា ភាគីទាំងសងខាងក្នុងជម្លោះបានប្រើគ្រឿងអាវុធគីមី។
ការងារ ចុះត្រួតពិនិត្យនេះបានត្រូវផ្អាកបណ្ដោះអាសន្នតាំងពីមានការចោទ ប្រកាន់ដំបូងៗបានលេចឡើងនៅខែមីនា ដោយសារតែការមិនចុះសម្រុងគ្នាជាមួយនឹងរដ្ឋាភិបាលស៊ីរីអំពី ទីកន្លែងដែលក្រុមអ្នកត្រួតពិនិត្យត្រូវចុះទៅមើល៕ (Radio Australia)