សមត្ថកិច្ចចាប់ឃាត់ខ្លួនជនបង្កជំលោះ ៣នាក់នៅក្នុងក្លិបកម្សាន្តរាត្រី
ភ្នំពេញ ៖ កាលពីវេលាម៉ោង ២៣ និង១៥នាទីយប់ ថ្ងៃទី២៣ ខែធ្នូ សមត្ថកិច្ចខណ្ឌ៧មករា ចាប់ឃាត់ខ្លួនជនសង្ស័យ៣នាក់ ដែលបានបង្កជំលោះ នៅក្នុងក្លិបកម្សាន្តរាត្រី town ដែលបណ្តាលឲ្យសន្តិសុខម្នាក់របួសធ្ងន់ធ្ងរ នៅក្នុងក្លិបកម្សាន្តរាត្រី town ខាងក្រោយ ក្រសួងអភិវឌ្ឍន៍ ជនបទ ក្នុងសង្កាត់មិត្តភាព ខណ្ឌ ៧មករា។
សមត្ថកិច្ចបានឲ្យដឹងថា មុនពេលកើតហេតុ គេសង្កេតឃើញមានភ្ញៀវមួយក្រុម ដែលមានគ្នាប្រមាណជា១០នាក់ បានចូលមកផឹកស៊ីនៅក្នុងក្លិបកម្សាន្តរាត្រី town ខាងលើនេះ ក្រោយមកពួកគេ ក៏ស្រាប់តែបង្កជំលោះមានអំពើហិង្សាដាក់គ្នា រហូតឈានដល់ការកាប់ចាក់គ្នា បណ្តាលឲ្យសន្តិសុខម្នាក់ដែលចូលទៅជួយឃាត់ពួកគេនោះ ត្រូវរងរបួសបែកក្បាល ស្ថិតក្នុងស្ថានភាពធ្ងន់ធ្ងរ។
បន្ទាប់ពីមានការប្រទូស្តរាយគ្នានោះ សមត្ថកិច្ចមូលដ្ឋាន បានចុះមកអន្តរាគមន៍ឃាត់ខ្លួនជនសង្ស័យ៣នាក់ ទី១. មានឈ្មោះ អឹង រុទ្ធីអាយុ ២៥ឆ្នាំ ទី២. ឈ្មោះហេង និងទី៣ មិនស្គាល់អត្តសញ្ញាណ។ ចំណែក ជនរងគ្រោះ ឈ្មោះ បូរី ជាសន្តិសុខក្នុងក្លិបរាត្រី town។
បច្ចុប្បន្ន ជនបង្កហេតុទាំង៣នាក់ ត្រូវបានសមត្ថកិច្ចឃុំខ្លួនបណ្តោះអាសន្ននៅអធិការដ្ឋាន ខណ្ឌ៧មករា ដើម្បីធ្វើការសាកសួរ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដោះស្រាយទៅតាមនីតិវិធីច្បាប់ ៕
ដោយ៖ ហេង នាង
