កំណើនសេដ្ឋកិច្ចជប៉ុនយឺតយ៉ាវ០,៦ភាគរយ ចន្លោះខែមេសា ដល់ខែមិថុនា ឆ្នាំ២០១៣
នៅថ្ងៃចន្ទនេះ រដ្ឋាភិបាលជប៉ុនបានចេញស្ថិតិមួយបង្ហាញថា កំណើនសេដ្ឋកិច្ចជប៉ុនមានការយឺតយ៉ាវ០,៦ភាគរយ ក្នុងចន្លោះខែមេសា ដល់ខែមិថុនា ឆ្នាំ២០១៣នេះ។ ផ្ទុយទៅវិញ ការយឺតយ៉ាវនៃកំណើននេះ ជាការលើកទឹកចិត្តដល់រដ្ឋាភិបាលប្រធានាធិបតីអាបេ ដែលកំពុងធ្វើកំណែទម្រង់ជាច្រើន ជំរុញសំទុះសេដ្ឋកិច្ចជាតិ។
កាលពី ឆ្នាំ២០១២កន្លងទៅ កំណើនសេដ្ឋកិច្ចជប៉ុនមានការថមថយ សំរាប់កំឡុងដើមឆ្នាំ និងកំឡុងរដូវក្តៅ។ ប៉ុន្តែ នៅចុងឆ្នាំ២០១២វិញ កំណើនសេដ្ឋកិច្ចបានចាប់ស្ទុះឡើងវិញ មុននឹងផលិតផលសរុបក្នុងស្រុកឈានដល់កម្រិត០,៩ភាគរយ នៅដើមឆ្នាំ២០១៣។
ដូច្នេះ នៅថ្ងៃចន្ទនេះ ការបង្ហាញពីភាពយឺតយ៉ាវនៃកំណើនសេដ្ឋកិច្ចកម្រិត ០,៦ភាគរយ គិតចាប់ពីខែមេសា ដល់ខែមិថុនា ឆ្នាំ២០១៣ បានធ្វើអោយអ្នកវិភាគនានាមានការខកចិត្តទៅវិញ ថ្វីដ្បិតតែផលិតផលសរុបក្នុងស្រុកជប៉ុន ស្ទុះលឿនជាងផលិតផលសរុបក្នុងស្រុករបស់សហរដ្ឋអាមេរិកក៏ដោយចុះ។ ការនាំចេញរថយន្តជប៉ុនទៅទីផ្សារអាមេរិក បានជួយអោយឧស្សាហកម្មក្នុងស្រុកមានសកម្មភាព។ ប៉ុន្តែនៅដើមឆ្នាំ២០១៣ កន្លងមក សកម្មភាពនេះបានថយចុះបន្តិចទៅវិញ។ ដោយសារការធ្លាក់ចុះថ្លៃប្រាក់យេន និងតំរូវការឧស្ម័នធម្មជាតិខ្ពស់ បន្ទាប់ពីជប៉ុនជាប់គាំងដោយសារបញ្ហានុយក្លេអ៊ែរនៅហ្វ៊ូគូស៊ីម៉ា មកនោះ ការនាំចូលក្នុងស្រុកបានកើនឡើង ធ្វើអោយសកម្មភាពឧស្សាហកម្មជប៉ុនថមថយ។ ជាងនេះដែរ ដំណើរការវិនិយោគសហគ្រាស និងអចលនវត្ថុផ្ទះសំបែង មានការរាំងស្ទះ ជាមូលហេតុសំខាន់នាំអោយកំណើនសេដ្ឋកិច្ចយឺតយ៉ាវ។
ផ្ទុយទៅវិញ សំរាប់ក្រសួងសេដ្ឋកិច្ចជប៉ុន ការយឺតយ៉ាវកំណើនក្នុងកម្រិត០,៦ភាគរយ បង្ហាញថាកំណើនសេដ្ឋកិច្ចជប៉ុនស្ថិតនៅក្នុងកម្រិតរឹងមាំ ហើយភាពរឹងមាំនេះ គឺកើតចេញពីគំរោងសេដ្ឋកិច្ចរបស់ប្រធានា ធិបតីអាបេ។ តាំងពីឡើងកាន់អំណាច នៅខែធ្នូ ឆ្នាំ២០១២មក រដ្ឋាភិបាលលោក អាបេ បានអនុវត្តកំណែទម្រង់សេដ្ឋកិច្ចជាច្រើន ដោយធ្វើការបន្ធូរបន្ថយនយោបាយរូបិយវត្ថុធនាគារជប៉ុន ព្រមទាំងចាយវាយថវិកាប្រចាំឆ្នាំ ជាង៤០ពាន់លានដុល្លារ សំរាប់ការងារសាធារណៈ៕ដោយ ព្រំ សឿន សូលីណា (RFI)